„Овој нов сој нè загрижува многу бидејќи уште полесно се пренесува и се чини дека мутирал понатаму во споредба со (првиот) новиот сој што беше откриен порано“, рече министерот, а пренесува „Бизнис инсајдер“
Втора, веројатно поинфективна варијанта на коронавирус со потекло од Јужна Африка е пронајдена во Велика Британија, објави вчера на прес конференција британскиот министер за здравство Мет Ханкок.
„Детектиравме два случаи на нов сој овде во Британија“, изјави Ханкок пред новинарите.
Тој додаде дека во двата случаи станува збор за контакти на луѓе кои пристигнале од Јужна Африка во изминатите неколку недели.
„Овој нов сој нè загрижува многу бидејќи уште полесно се пренесува и се чини дека мутирал понатаму во споредба со (првиот) новиот сој што беше откриен порано“, рече министерот, а пренесува „Бизнис инсајдер“.
За вирусите е типично да мутираат, а варијантите (соевите) не мора нужно да се поштетни или смртоносни. Експертите претходно за „Инсајдер“ изјавија дека е малку веројатно дека мутациите во првата варијанта ќе го запрат делувањето на вакцините против COVID-19, болест предизвикана од новиот коронавирус.
Премиерот Борис Џонсон и неговите советници во саботата информираа за нов сој на коронавирус кој би можел да биде за 70 % позаразен и брзо се шири низ Велика Британија, иако не се смета за посмртоносен или опасен за развој на потешка форма на болеста.
Написите за мутираниот сој од Англија предизвикаа затворање на земјата пред Божиќ и принудија десетици земји да ги затворат своите граници со Велика Британија оваа недела.
