Келси Хачер, 32-годишна жена од Алабама, е родена со две матки и сега во двете има фетус. Таа имала 17 години кога дознала за дијагнозата на двојна матка (лат. uterus didelphys), ретка аномалија за која се смета дека погаѓа 0,3 отсто од жените. Во мај, при рутинска посета на гинеколог во 8-та недела од бременоста, оваа мајка на три деца дознала дека не очекува едно, туку уште две деца, односно дека е присутен фетус во секоја од нејзините матки. „Најверојатно дошло до одвоени овулации, односно по една јајце клетка од секоја матка патувала во јајцеводот, а потоа сперматозоид ја оплодил секоја од нив“, објаснува гинекологот на Келси, Швета Пател.
Иако жените со двојни матки често се соочуваат со компликации за време на бременоста, сите три деца на Келси се родени здрави, во термин. Затоа таа се надева дека овие две деца ќе се родат по природен пат, но веројатноста за тоа овојпат сепак не е голема. Со оглед дека постои можност породилни болки на матките да се појават во различно време, што може да биде со растојание од неколку минути, часови, па дури и денови, Келси и нејзиниот сопруг, Кејлеб Хачер, се свесни дека царските резови – за едното или двете бебиња – се очигледна опција.
Бремености во две матки се исклучително ретки. Последниот ваков регистриран случај се случил во Бангладеш во 2019 година кога Арифа Султана, тогаш 20-годишна, родила здрави близнаци со разлика од 26 дена.
