Гостин во новото издание на подкастот „Ваш педијатар“ е проф. д-р Дејан Докиќ, специјалист пулмоалерголог и директор на Универзитетската клиника за алергологија и пулмологија.
Проф. д-р Докиќ одговара на повеќе прашања, со кои се обидуваме да разрешиме дел од најчестите дилеми и нејаснотии кои се однесуваат на астмата – хронично воспалително заболување на дишните патишта, коешто се манифестира со одредени симптоми. „Најчесто се работи за кашлица, која воглавно може да биде сува, или некогаш може да се искашлуваат мали, како бисерни искашлоци, густи, лепливи, но исто така се карактеризира и со стегање во градите, гушење, и свирење во градите. Тоа се најчестите симптоми“, вели проф. д-р Докиќ во подкастот „Ваш педијатар“.
Астмата има многу лица – болеста ги погодува луѓето од сите возрасти и полека достигнува епидемиски размери. Најчесто се појавува за прв пат во детството и иако може да биде сериозна состојба, таа може да се контролира со правилен третман. Првиот чекор е да се идентификуваат и избегнат тригерите.
