УВ индексот е развиен од Американската национална метеролошка служба и од Американската агенција за заштита на средината, со цел да се обезбедат информации кои би биле од корист при планирање на одредени активности и превенирање на опасноста од прекумерното изложување на сончевите зраци.
УВ индексот се одредува секојдневно и ја предвидува јачината на УВ зрачењето, кое доаѓа до површината на земјата, и тоа на скала од 1 до 11+. 1 значи низок ризик, а 11+ претставува екстремен ризик. При негово одредување се земаат во предвид повеќе фактори како што се: степенот на облачност, висината на сонцето, географската ширина, надморската висина, присуството на озон во атмосферата, рефлексија од одредени површини и други локални услови кои влијаат на УВ радијацијата која стигнува до површината на Земјата.
УВ индексот варира во текот на денот. Така, во летните месеци наутро и навечер е низок ризикот од УВ зрачењето, до 11 часот и после 17 часот е умерен, а највисок е во пладневните часови.
ТОЧНО
- Потемнета кожа е одбрана на организмот од понатамошно оштетување од УВ зраци.
- Темен тен дава ограничена заштита која е еднаква на користење на крем со СПФ 4.
- 80% од УВ зраците може да поминат низ облаци.
- Водата овозможува минимална заштита од УВ зрачењето, но рефлексијата може да го зголеми негативниот ефект на УВ зраците врз кожата.
- УВ зрачењето е послабо во зима, но снегот ги рефлектира зраците, особено на повисоките места поради што може да доведе до изгоретини.
- Изгоретини настануваат од влијанието на УВ зраците кои не секогаш ги чувствувате и како топлина.
- Изложеноста на УВ зраци е кумулативна во тек на денот.
НЕТОЧНО
- Потемнета кожа е здрава.
- Потемнета кожа штити од сонце.
- Не може да се изгори кога надвор е облачно.
- Не може да се изгори додека си во вода.
- УВ зрачењето во зима не е опасно.
- Кремите за сончање ја штитат кожата и може да останете подолго време на сонце, особено кога надвор е ветровито и пријатно за сончање.
