Сите имаме спомени од детството поврзани со Велигден – мирисот на празничната трпеза, прекрасната атмосфера додека помагаме во вапсувањето на јајцата, обоените прстиња, нетрпеливоста да дојде полноќ за да се кршиме и да видиме чие јајце ќе биде најсилно…
Чувството на топлина, присутно во секој агол од домот, се уште е силно, како да било вчера. Единствено што сега ние сме родителите, а малите прстиња на нашите деца се обоени во црвена, жолта, зелена и сите нијанси на празничната радост што ја носи празникот над празниците. Сетете се само како се чувствувавте како дете кога ви раскажуваа приказни за велигденските традиции – тој момент на зачуденост и радост… Сега, кога го правите истото за своите деца, го споделувате истото чувство на топлина и припадност.
Заедничките моменти со семејството градат доверба и емоционална сигурност
Велигден симболизира нов живот, светлина по темнината и надеж, пораки кои децата ги чувствуваат преку атмосферата дома, празничните подготовки и вниманието од возрасните. Овие симболи поттикнуваат позитивно расположение и создаваат чувство на стабилност и сигурност кај децата, особено во периоди кога им е потребна емоционална поддршка.
За децата, Велигден најчесто значи вапсување јајца со семејството, креативни работилници, одење на гости и чекање гости, убава топла домашна атмосфера… Сите овие активности им носат забава, но и нешто многу подлабоко на децата – чувство на припадност, заедништво и вредност. За многу деца тоа е можност да се изразат, да научат нови вештини и да почувствуваат дека се дел од нешто важно.
Вредности кои оставаат трага
Велигден е можност децата да се запознаат со приказната за Исусовата жртва и воскресение на едноставен, нивен јазик. Преку тоа учат за љубовта, прошката, добрината, надежта по тешки моменти. Овие вредности: љубов, прошка, добрина и надеж не се само верски поими, туку и основа за емотивна зрелост и емпатија, кои се клучни столбови на менталното здравје кај децата.
Кога детето учи да простува, да разбере други луѓе, да покаже добрина и да верува дека после тешкотии следи нешто добро – тоа гради внатрешна сила и отпорност. Тоа му помага да се справува со разочарувањата, несогласувањата и секојдневните предизвици на поздрав начин.
Преку разговори за овие вредности, преку приказни за воскресението и преку личен пример од возрасните, децата учат:
- Да ги препознаваат и именуваат своите чувства.
- Да се стават на место на другите.
- Да градат односи засновани на почит и доверба.
- Да не се срамат од тагата или стравот, туку да знаат дека секое чувство е нормално.
- Да веруваат дека секоја тешка фаза е минлива.
За децата, Велигден најчесто значи вапсување јајца со семејството, креативни работилници, одење на гости и чекање гости, убава топла домашна атмосфера… Сите овие активности им носат забава, но и нешто многу подлабоко на децата – чувство на припадност, заедништво и вредност. За многу деца тоа е можност да се изразат, да научат нови вештини и да почувствуваат дека се дел од нешто важно
Таквото разбирање, дури и во најосновна детска форма, создава емоционално стабилна личност која знае да се грижи за себе и за другите, што е суштината на доброто ментално здравје.
Како Велигден го поддржува менталното здравје на децата?
- Рутина и предвидливост: Празниците со познати ритуали им даваат чувство на стабилност.
- Поврзување: Заедничките моменти со семејството градат доверба и емоционална сигурност.
- Изразување чувства: Креативните активности се одличен начин децата да ги изразат своите емоции.
- Позитивно расположение: Славење, игра и подароци носат радост и го намалуваат стресот.
- Разговори за вредности: Помагаат децата да разберат што е важно во животот, што ја гради нивната самодоверба.
СОВЕТ ЗА РОДИТЕЛИТЕ: Не е важно сè да биде совршено – најважно е времето поминато заедно. Поканете ги децата во заеднички активности, раскажете им за своите велигденски спомени и создадете нови – токму тие моменти се оние кои градат среќни и емоционално стабилни деца.
