Бремените жени имаат зголемена веројатност за рано и предвремено породување по топлотни бранови што траат четири последователни дена, покажуваат истражувањата.
Научниците анализирале здравствени податоци на 53 милиони жени кои родиле во периодот од 1993 до 2017 година во 50 метрополски подрачја во САД. По четиридневен топлотен бран, биле забележани 2 % повеќе предвремени породувања и 1 % повеќе ранотермински породувања. Наодите се објавени во реномираното списание JAMA Network Open.
Според студијата, секое зголемување на просечната температура за 1 степен Целзиус над утврдениот праг било поврзано со дополнителен 1 % пораст на стапката на предвремени породувања.
Овие наоди се особено значајни со оглед на исклучително жешкото лето. „Прогнозираме многу топло лето оваа година, а поради климатските промени, топлотните бранови ќе стануваат сè почести во иднина“, изјави д-р Хауард Чанг, професор по биостатистика и биоинформатика на Факултетот за јавно здравје „Ролинс“ при Универзитетот Емори и главен автор на трудот. „Нашата студија покажува дека зголемената температура може да доведе до полоши здравствени исходи за новороденчињата, бидејќи предвремено родените бебиња се подложни на здравствени компликации и поголеми трошоци за здравствена грижа.“
Топлотен бран во студијата се дефинира како период кога просечната дневна температура е повисока од 97,5 % од типичните температури за тој регион, четири последователни дена.
Предвремени породувања се оние што се случуваат пред 37-та недела од бременоста, додека ранотермински се оние пред 39-та недела. Нормалната гестација трае 40 недели.
Истражувањето, исто така, открива и значајни нееднаквости во здравствената заштита. Мајките под 30 години, со завршено средно образование или пониско, како и припадничките на етнички и расни малцинства, имале уште поголема веројатност за предвремено или рано терминско породување по изложеност на топлотен бран.
Како можни причини се наведуваат ограничениот пристап до климатизација и соодветна здравствена грижа, пренесува WebMD.
