Изборот на зборови кога разговарате со децата е поважен отколку што мислите. Кога сте премногу уморни или раздразливи, може да биде тешко да останете позитивни додека разговарате со вашето дете или го дисциплинирате. Сепак, важно е што зборувате и како го кажувате, предупредува експертот за родителство Ерика Кац.
Зборувањето со емпатија и љубезност може да помогне во ублажувањето на анксиозноста, сомневањето во себе и ниската самодоверба додека децата растат, а тоа го потврдуваат и истражувањата. Позитивното родителство може да го зајакне менталното здравје на детето, да доведе до академско подобрување и да промовира благосостојба во текот на тинејџерските години и во зрелоста, според наодите на Универзитетот Дејвис во Калифорнија.
Од друга страна, кога родителите ги посрамуваат децата, тоа им ја намалува самодовербата и мотивацијата. На децата им треба и самодоверба и мотивација за да успеат бидејќи овие квалитети им помагаат подобро да се справат со животните препреки и да покажат издржливост.
Според Кац, постојат четири фрази што ги користат родителите кои воспитуваат успешни деца.
- Кога детето започнува некоја работа, но не ја завршува: „Ти направи одлична работа. А зошто не би и…?“
- Кога детето е агресивно: „Знам дека си вознемирен, но не смееш да (удираш, гризеш,…)“
- Кога детето се бори со домашната задача: „Многу добро ја направи оваа задача. Знам дека можеш да направиш уште една“.
- Кога внимателно не сте постапиле со емоциите на детето: „Се извинувам. Не бев внимателен/на кон тебе“.
Да се започне со позитивното пред да се дојде до негативното е најефективниот пристап, тврди Кац.
