Анксиозноста е исклучително честа појава меѓу децата. За време на периодот на пандемијата, истражувачите забележале дека на дури 7 % од децата им било дијагностицирано анксиозно пореметување кое го попречувало нивното секојдневно функционирање. Освен тоа, 20 % имале склоност кон анксиозност која не достигнала ниво на клиничко нарушување, пишува „The Conversation“.
Прашајте ги децата како се чувствуваат кога ќе се вратат на училиште и внимавајте на главоболки, стомачни болки, проблеми со спиењето, упорни прашања „што ако…“, мрзливост, прекумерна загриженост и проблеми со фокусирање
Анксиозноста повторно ќе се појави кај многу деца оваа есен, а таа може да биде испреплетена со други чувства, како што се возбуда и срамежливост. Затоа професорките Елизабет Инглендер и Кетрин Ковино-Путасе наведуваат чекори што родителите можат да ги преземат за да ја намалат вознемиреноста на нивните деца поради враќањето на училиште и да поттикнат подобар почеток на првото полугодие.
Препознајте ги општите симптоми на анксиозност
Прашајте ги децата како се чувствуваат кога ќе се вратат на училиште и внимавајте на главоболки, стомачни болки, проблеми со спиењето, упорни прашања „што ако…“, мрзливост, прекумерна загриженост и проблеми со фокусирање. Кое било од овие однесувања може да укаже на анксиозност.
Поттикнете ги активностите кои ја намалуваат анксиозноста
Играњето на отворено, играњето со пријателите или обичните дружења може да бидат корисни алатки за намалување на негативните чувства. На отворено, луѓето често се чувствуваат поопуштено. Играњето на неструктуриран начин – т.е. без некој друг да им кажува што или како да си играат – им овозможува на децата да работат на своите чувства и да ја намалат анксиозноста.
Во време на зголемен стрес и неизвесност, поминувањето време со семејството може да делува како „противотров“. Прошетајте или планинарете заедно, вечерајте заедно или играјте друштвени игри
Ограничете го времето кое децата го поминуваат пред екраните
Постои значителен број докази кои покажуваат врска помеѓу прекумерната употреба на дигитални уреди и анксиозноста. Така, прекумерната употреба на уреди може да придонесе за зголемени стапки на анксиозност кај децата.
Фокусирајте се на семејните активности
Во време на зголемен стрес и неизвесност, поминувањето време со семејството може да делува како „противотров“. Прошетајте или планинарете заедно, вечерајте заедно или играјте друштвени игри.
Прифатете го одвлекувањето на вниманието
Одвлекување на вниманието не е лек за анксиозност, но може да го намали нејзиниот интензитет и да им помогне на децата појасно да размислуваат за изворот на нивните грижи. Кога децата се чувствуваат многу вознемирено, во ред е да разговарате со нив за тоа како гледањето телевизија или читањето забавна книга може да им помогне да се чувствуваат посмирени.
Побарајте стручна помош кога е потребно
Ако анксиозноста му го попречува спиењето на вашето дете, јадењето, дружењето или посетувањето на училиште и трае повеќе од неколку дена, добро е да се јавите кај вашиот педијатар или матичен лекар и да ги известите што се случува. Медицинските работници кои работат со деца знаат како да му ја пружат потребната помош на детето.
