За алергиите многу се знае, но и понатаму постојат многу заблуди, вели педијатарот Горан Вукомановиќ, кој стручно преку разбивање на заблудите објаснува се за оваа состојба кај децата.
- Се уште е рано, нема алергии пред средината на април
Не е рано, сега е вистинско време да се зборува за пролетните алергии!
Сите знаеме кога календарски започнува пролетта, но растителниот свет не ги признава човековите временски поделби. За тревите, пролет е кога ќе огрее сонце. Оваа зима не беше особено сурова, па вегетацијата започна порано.
Доволни се неколку сончеви денови за речиси се да биде зелено. Оваа година е чудна, но имаше студени денови, но и топлата прва половина на февруари ветува дека оваа година тревите ќе процветаат порано.
“Искусните алергичари“ може да ги почувствуваат првите симптоми веќе овие денови!
- Мајката има алергија на полен, мора и децата
Не мора секогаш да биде така!
Склоноста кон алергии се нарекува атописка конституција. Преведено на обичен јазик, тоа значи дека постои генетски запис кој е заслужен за алергиските болести, тоа е точно. Сепак треба да се знае дека не се наследуваат алергиските болести, туку склоноста кон алергии!
Тоа значи дека децата веројатно носат “ген за алергија“ што го добиле од родителите, но воопшто не мора да добијат и поленска алергија.
Сè уште е тајна како започнуваат алергиските болести – што точно ги „буди“ и зошто некој има симптоми од седумгодишна возраст, а некој се разболува на 30 години. Исто така, не е целосно јасно зошто од три деца од семејство каде и таткото и мајката се „алергични“, две немаат проблеми, а само едно добива некоја алергиска болест.
- Дете кое има поленска кивавица (алергиски ринитис) може да зарази други деца
Ова никако не е точно!
Обичната, вирусна кивавица лесно се пренесува од дете на дете, но тоа се вирусни болести. Алергијата не е инфекција (иако личи на класична кивавица), па не може да се пренесе од болно на здраво дете.
Тоа што носот тече, а очите се црвени, ЗНАЧИ НЕ Е од инфекција, па нема ОПАСНОСТ од зараза.
- Алергискиот ринитис е несериозна болест, тоа само ќе помине, не треба терапија, освен физиолошки раствор во носот
За жал не е така, и ова е заблуда!
Секако не се работи за некоја сериозна болест, но секој кој искусил поленска алергија знае дека тоа и не е така несериозно.
Современата медицина многу добро ги разбира механизмите на појава на алергијата, па се развиени современи корисни и ефикасни лекови за борба против пролетните алергии. Физиолошкиот раствор и слични препаратисе корисни за прочиствување на носот, но не се лек против алергија. Лековите се даваат во консултација и по препорака на педијатар.
- Лекувањето треба да се прекине штом исчезнат тегобите на алергискиот ринитис
Погрешно!
Лекувањето се продолжува и по елиминирање на симптомите на поленска алергија.
Тоа е затоа што алергиската реакција е присутна се додека е присутно она што ја предизвикува алергијата. На детето веќе по неколку дена терапија ќе му биде подобро, но поленот е тука најмалку уште неколку недели. Затоа терапијата се продолжува неколку недели по смирување на тегобите.
Секако, сите детали околу видот и траењето на терапијата треба да се прецизираат со педијатарот кој го следи детето. Родителите не треба да ја прекинуваат терапијата на своја рака, дури и ако на детето му е видно подобро.
- Детето имало блага форма на алергија на полен минатата пролет, па оваа година нема да ја има
За жал, и ова не е точно!
Многу е поголема шансата детето оваа сезона да има побурна реакција. Тоа е затоа што кај алергијата неретко постои “синџирна реакција“ при што со тек на време спектарот на алергени се шири, па и алергиската болеста станува поизразена.
