Министерството за здравство информира дека од вчера, преку веб-страницата vakcinacija.mk, започна пријавувањето за бесплатна вакцинација против сезонски грип за ризичните групи население.
Од Министерството информираат дека се набавени 70.000 дози четиритипна вакцина против сезонски грип, а оттаму додаваат дека бројот на обезбедени вакцини континуирано се зголемува.
Вакцинацијата се препорачува пред почетокот на сезоната на грип, бидејќи телото има потреба од околу две недели за да развие имунитет. Сезоната на грип обично започнува во есен и трае до пролет, па оптималното време за вакцинација е во октомври или ноември
Како да се пријавите?
Пријавувањето се врши со пополнување на апликацијата на веб-страницата vakcinacija.mk, со што директно се регистрирате за вакцинација во системот „Мој Термин“. Согласно распоредот предвиден во планот за вакцинација, преку смс ќе добиете повратна информација за точниот датум, час и место кога треба да се вакцинирате.
Кои лица спаѓаат во ризични групи?
Со бесплатна вакцинација се опфатени следните ризични групи:
- повозрасни лица (над 65 години),
- лица со хронични заболувања,
- здравствени работници,
- бремени жени,
- деца на возраст од 6 месеци до 5 години,
- лица сместени во установи за социјална заштита на стари лица и вработените во установи за социјална заштита на стари лица.
Вакцинацијата против сезонски грип е важна превентивна мерка која се препорачува особено за лицата кои спаѓаат во ризични групи. Оваа вакцина помага да се спречи појавата на грип или да се намали сериозноста на симптомите доколку некој се зарази. Исто така, помага да се намали ширењето на вирусот во заедницата, што е важно за заштита на оние кои не можат да се вакцинираат поради одредени медицински причини
Од Министерството потсетуваат дека вакцинацијата против сезонски грип е најефикасната мерка за превенција, која спречува појава на потешки форми на грип, компликации и смртен исход особено кај ризичните групи.
Треба да се има предвид дека вакцината не гарантира 100 % заштита од грип, но дури и ако некој се зарази по вакцинацијата, симптомите обично се полесни и ризикот од компликации е значително намален.
