Се почесто родителите се жалат дека нивните деца на возраст помеѓу 9 и 10 години почнуваат да имаат непријатен телесен мирис. Но, непријатниот мирис од потта на таа возраст е знак за влегување во претпубертет и укажува на тоа дека доаѓа до одредени хормонални промени во детското тело.
Непријатниот мирис на телото сигнализира за почеток на пубертетот и може да се забележи веќе со 7 години кај девојчињата и 9 години кај момчињата.
Пред се, треба да разговарате со вашето дете и да му објасните колкава е важноста на хигиенските навики и да му укажете на влегувањето во животната промена наречена пубертет, која ќе го следи неколку години на сите нивоа.
Но, ако непријатниот мирис на телото започне пред 7 до 9 години или е чуден, отидете на педијатар. Имено, одредени медицински состојби како дијабетес тип 1 може да предизвикаат мирис на ацетон. Исто така, исхраната која вклучува прекумерно внесување на пржена храна може да предизвика непријатен мирис кај децата од сите возрасти.
Кои хигиенски навики треба да ги усвојат децата во претпубертетот?
Во време кога децата почнуваат поинтензивно да се потат, научете ги дека секојдневното туширање е “задолжително“, особено после физичка активност, бидејќи со потта се спојуваат и бактериите насобрани на кожата кои придонесуваат за појава на непријатен мирис.
Дезодорансите можат да помогнат и во ублажување на непријатниот мирис, но внимавајте да им давате на децата производи само на природна основа, без додатоци на алуминиум и други штетни соединенија. Бидете внимателни и со дезодорансите на природна база, бидејќи некои може да предизвикаат алергиски реакции, затоа нека вашето дете прво ги тестира на внатрешната страна на подлактицата.
Покрај редовната хигиена, важно е детето да пие многу вода и да се храни со здрава и разновидна исхрана, притоа избегнувајќи индустриски преработена храна.
