Во некои семејства е речиси вообичаено да се раѓаат близнаци, а сега истражувачите идентификувале два гена кои ги зголемуваат шансите жената да роди двојајчани близнаци.
Двата гена кои научниците ги наведуваат, се поврзани со производството и обработката на хормоните кои им помагат на јајце клетките да созреат.
“Постои голем интерес за близнаци, како и за тоа зошто некои жени раѓаат близнаци, а други не“, вели авторот на студијата, биолошкиот психолог на Универзитетот во Амстердам, Дорет Бумсма.
Во многу ретки случаи, може да дојде до зачнување на полуидентични близнаци, кои се зачнати од иста јајце клетка, но од две различни сперматозоиди.
Научниците одамна знаат дека жените во чии семејства – особено од женска страна – веќе постојат близнаци, имаат поголеми шанси и самите да родат близнаци, оти тука генетиката игра огромна улога. Освен тоа, повозрасните жени кои се лекуваат од неплодност, имаат поголеми шанси да зачнат близнаци.
Но, за научниците да откријат кои гени точно ги зголемуваат шансите идната мајка да роди близнаци, Бумсма и неговиот тим ги анализирале геномите кај 1.980 жени кои по природен пат зачнале двојајчани близнаци и тоа го споредиле со гените кај 12.953 мајки кои родиле по едно дете.
Тие забележале дека постојат одредени варијанти на гените кои почесто се појавуваат кај жените кои раѓаат близнаци.
Едната варијанта на генот наречен FSHB е поврзана со поголемо производство на хормонот FSH кој ги стимулира фоликулите и помага јајце клетка да созрее. За време на секој циклус во женското тело се ослободува јајце клетка откако ќе созрее. Ако во телото има повеќе од хормонот FSHB, поголеми се шансите во текот на циклусот да се ослободат две јајце клетки, велат стручњаците.
Втората варијанта е генот SMAD3, а овие жени произведуваат просечна количина FSH, но јајчниците се почувствителни на хормоните, поради што ослободуваат по две јајце клетки секој месец.
