За време на бременоста, голем број трудници може да доживеат крварење од различни причини, а тоа често може да биде знак за хематом.
“Хематомите во бременоста едноставно значат насобирање на крв во просторот помеѓу постелката и матката; нивната локација може да биде различна, но најчести се на страничните делови од постелката, особено ако таа е всадена во долните делови на матката, објаснуваат гинеколозите.
Иако кај повеќето трудници се јавува во првото тромесечје, хематом на постелката може да се појави било кога во бременоста. Зависно од времето кога ќе се појави, велат лекарите, различен е и механизмот, но и сериозноста на појавата.
“Во текот на првото тромесечје најчесто се работи за недостаток на хормонот прогестерон, ниско всадување на посетлката на места кои не се оптимални, или за дискретно пукање на капиларите на постелката. Во тие случаеви, хематомите најчесто се самоограничувачки, односно по иницијалното крварење, постапно се стопира ширењето по спонтаната тампонада на местата на крварење“, објаснуваат стручњаците.
ОПАСНО КРВАРЕЊЕ ВО ДОЦНА БРЕМЕНОСТ
Лекарите предупредуваат дека појавата на хематоми во второто и во третото тромесечје е многу сериозна, како и нивната причина.
“Контракции на матката, односно заканувачки спонтан абортус, хипертензија во бременоста, која може да биде надоврзана на претходно постоечка или одново да се појави, кога се зборува за прееклампсија, неретко доведуваат до создавање на хематом со различни големини. Колку подоцна се појавуваат во бременоста, толку состојбата е посериозна, а апсолутна најопасен вид на хематом е привремено лупење на постелката кое се нарекува абрупција. За среќа, оваа состојба е многу ретка“, потенцираат лекарите,
На појавата на хематом најчесто укажува вагиналното крварење, а гинеколозите предупредуваат дека секое крварење во бременоста, било да станува збор за рана или доцна бременост, или било да се гледа надворешно или на ултразвук, во праксата значи потенцијален спонтан аборус или предвремено породување.
