Повеќе од половина од трудниците страдаат од жиговина, наречена и гастроезофагеална рефлуксна болест, а она што е важно да се знае е дека тоа нема никаква врска со срцето.
Оваа непријатна состојба е предизвикана од рефлукс, односно враќање на храната од желудникот, која стигнува до хранопроводникот. Кога тоа ќе се случи, желудочните киселини ја иритираат слузницата на хранопроводникот, што доведува до чувство на печење во стомакот и хранопроводникот.
Жиговината се јавува почесто за време на бременоста, бидејќи хормоните предизвикуваат забавување на дигестивниот систем. Ова им дава на хранливите материи повеќе време да се апсорбираат во крвотокот и да стигнат до плодот, но исто така е потребно подолго време за да се испразни желудникот. Ова е често придружено со лошо варење или жиговина.
Дополнително, во последните месеци од бременоста, матката која постојано се шири врши притисок врз желудникот, а поради овој притисок, желудочната киселина се крева нагоре, предизвикувајќи жиговина.
Превенција
Иако главно безопасна, жиговината воопшто не е пријатна, но можете да преземете некои мерки за да ја спречите.
- Јадете почесто и во помали количини, на пример, пет до шест мали оброци дневно, наместо три големи оброци.
- За некои намирници поголема е веројатноста да го иритираат стомакотт и хранопроводникот, затоа обидете се да избегнувате намирници за кои ќе утврдите дека ви пречат.
- Избегнувајте мрсна, тешка или пржена храна, како и кафе, чај, чоколадо, алкохол, газирани пијалаци, многу слатка храна, кисела храна, како што се агруми и нивните сокови, домати, црвени пиперки и многу зачинета храна.
- Консумирајте што е можно повеќе течности, особено вода.
- Седете правилно додека јадете бидејќи искривеноста може да предизвика прекумерен притисок врз стомакот.
- Одморете се еден час после јадење.
- Не јадете ништо два до три часа пред спиење. Кога е празен, желудникот произведува помалку киселина.
- Избегнувајте движења и положби кои може да го влошат проблемот.
- Кога одморате или спиете, потпрете се на перници за да ги подигнете главата и рамената.
Кога треба да побарате медицинска помош?
Ако жиговината стане сериозен проблем и го попречува вашиот секојдневен живот, посетете лекар. Не земајте никакви лекови без консултација со вашиот лекар.
