Во некои семејства се случува да се раѓаат само момчиња – не само во една, туку во неколку генерации по ред. Во други, пак, се раѓаат исклучиво девојчиња. Дали тоа значи дека некои семејства се „специјализирани“ за раѓање деца од еден пол?
Која е причината за овој феномен и дали семејство кое со генерации имало само момчиња или само девојчиња може да добие дете од другиот пол? Еве што вели науката.
Не постои „ген за ќерка“ или „ген за син“
Иако повеќето семејства имаат нерамномерен сооднос на половите, а некои родители веруваат дека во нивното семејство „владеат“ гените за момчиња или девојчиња, научниците досега не пронашле никакви докази што би потврдиле дека генетиката одредува дали едно семејство ќе има деца само од еден пол. Можно е во иднина науката да открие нови сознанија, но засега нема докази дека семејните гени влијаат врз тоа дали ќе се раѓаат само момчиња или само девојчиња.
Полот го одредува таткото
Иако често се мисли дека полот на детето зависи од мајката бидејќи таа ја носи бременоста, биолошки гледано, одлучувачка улога има таткото. Спермата носи полови хромозоми – некои сперматозоиди носат X хромозом (девојче), а други Y хромозом (момче). Жената секогаш носи два X хромозома, па полот на бебето зависи од тоа дали јајце-клетката ќе биде оплодена со X или Y сперматозоид.
Во периоди на стрес почесто се раѓаат девојчиња
Научниците сепак откриле одредени фактори кои можат да влијаат врз полот. Истражувањата покажуваат дека по периоди на силен стрес – како природни катастрофи или пандемии – се раѓаат повеќе девојчиња отколку момчиња. Се смета дека ова може да биде поврзано со стресот на кој биле изложени идните мајки.
Исхраната може да влијае на шансите
Одредени студии укажуваат дека исхраната може да има мало влијание врз полот на бебето. Намалениот внес на сол и почестата консумација на млечни производи може да ги зголеми шансите за зачнување девојче. Од друга страна, исхрана богата со натриум и калиум се поврзува со поголема веројатност за раѓање момче.
Во најголем број случаи – станува збор за случајност
Родовата рамнотежа со векови останува речиси непроменета и не постојат фактори што значително ја нарушуваат. Семејствата со многу деца од ист пол се ретки, но ова може лесно да се објасни статистички. Секое дете има 50% шанса да биде момче или девојче. Така, на пример, шансата три деца по ред да бидат од ист пол изнесува 0,5 × 0,5 × 0,5 = 0,125, односно 12,5%.
