Подигањето семејство со одржување на рамнотежа во животот е форма на уметност, вели психотерапевтот Бартон Голдсмит. Тој наведува десет алатки кои го олеснуваат воспитувањето на децата.
Препознајте ги силните страни на вашето дете
„Можете да ги употребите за да ја изградите самопочитта кај детето и да ја зајакнете самодовербата потребна за да се справи со се што изгледа тешко. Децата ќе бидат поподготвени да слушаат и да разберат како да го поправат негативното однесување ако нивното достоинство е недопрено“, пишува Голдсмит.
Наместо казнување, користете пофалби и награди
Психотерапевтот вели дека родителите не треба да се фокусираат на слабостите, туку да најдат начини како да му помогнат на детето да се развие до полн потенцијал. Кога ги охрабруваме децата, им помагаме да стекнат таленти со кои ќе ги надоместат нивните недостатоци.
Избегнувајте негативни емоционални реакции како лутина, сарказам и потсмев
Ако детето има проблеми со контролата, негативните реакции од родителите само ќе го натераат да се чувствува полошо.
Не ги споредувајте браќата и сестрите
Ако детето мисли дека неговиот или нејзиниот брат или сестра е фаворизиран, тоа може да создаде ривалство што може да трае цел живот и да предизвика проблеми во семејството. Дајте им до знаење на вашите деца дека се подеднакво сакани.
Побарајте поддршка ако ви треба
Барањето професионален совет кога е потребно ќе ви помогне да останете разумни и да уживате во вашето родителско искуство.
На децата им треба позитивно внимание
Секое внимание е подобро отколку да се игнорира. Затоа, доколку детето не добие позитивно внимание, може да бара внимание на негативен начин, што секој родител сака да го избегне.
Следете како вашето дете користи Интернет
Сајбер-просторот може да биде опасен. Голдсмит предлага да проверите кои страници ги посетува вашето дете, како и да ги следите нивните разговори.
Прифатете дека животот се менува кога имате дете
„Лежерните саботни утра во кревет ќе ги заменат фудбалските натпревари и танцовите настапи. Запомнете дека, без оглед на тоа, партнерите сепак треба да најдат време еден за друг – излегувањата и викендите се важни за вашата врска“, предупредува психотерапевтот.
Водете го детето со сопствениот пример
Децата имитираат сè што правиме. Ако се однесувате лошо, му давате дозвола на вашето дете да се однесува на ист начин.
Не се откажувајте од вашето дете
„Сите проблеми на вашето дете можат да се решат со хумор, добра волја и истрајност. Со соодветна родителска поддршка, дури и најпроблематичните тинејџери можат да станат неверојатни луѓе“, вели Голдсмит.
