Да се биде родител воопшто не е лесна задача и не треба да се сфаќа лесно. Родителството и воспитувањето на децата драстично се променија во современото време, најмногу под влијание на видеоигрите, интернетот и сè поприсутните брендови. Сепак, клучот за детската среќа не лежи во совршенството – нешто што децата и онака не го очекуваат. Најважното што можете да им го дадете е чувството дека се сакани, а родителите кои во тоа успеваат најчесто имаат неколку заеднички навики.
1. Си играат со своите деца
Играта е јазикот на децата. Тоа значи да се спуштите на под и да си играте со нив на нивно ниво. Кога се играте со вашето дете, тоа навистина се чувствува видено и сакано.
„Кога целосно ќе му се посветите на играта со детето, му давате прекрасна можност да изгради самодоверба. Замислете како се чувствува вашето дете знаејќи дека најважната личност во неговиот свет го сака доволно за да одвои време за игра со него“, вели Кристина Пеј, доцентка на Универзитетот Јута Стејт.
2. Знаат што се случува во училишниот живот на детето
Останете во контакт со наставникот за да знаете како поминува денот на вашето дете. Секако, прашувајте го и него, но имајте предвид дека одговорите ќе зависат од возраста.
Исто така, потрудете се секое утро да го испратите со прегратка и бакнеж. Како општество сè повеќе се оддалечуваме од физичкиот контакт, но на децата им е потребен.
„Сите живееме забрзани и стресни животи, но јасно е дека една од најважните работи што треба да ги направиме е да застанеме и силно да ги прегрнеме нашите деца“, истакнува Сeнди Шварц од Институтот Готман. „Истражувањата покажуваат силна врска меѓу приврзаноста во детството и здравјето и среќата подоцна во животот.“
3. Не се обидуваат да поправат сè
Дел од растењето и учењето грижа за себе е и учењето како да се решаваат сопствени проблеми. Така децата развиваат отпорност – вештина потребна во речиси секој аспект од животот.
„Да се биде строг родител никогаш не е лесно“, вели клиничкиот психолог Кејт Робертс, „но алтернативата е уште потешка. Децата кои растат без никаква непријатност – било да прескокнуваат училиште, играат видеоигри со часови или одбиваат да научат основни вештини – често имаат повеќе анксиозност и помалку животни способности.“
4. Не ги преоптоваруваат децата со правила
Кога детето има премногу правила, може да се повлече. Започнете со неколку јасни и едноставни правила и доследно придржувајте се до нив. Така детето знае што се очекува од него и дека постојат последици ако правилата не се почитуваат.
„Речиси сите деца веруваат дека родителите треба да поставуваат правила што ги штитат, им помагаат да бидат подобри и морални луѓе и полесно да се вклопат во општеството“, објаснува психологот Ненси Дарлинг.
5. Секојдневно читаат книги заедно
Започнете уште од бебе. Децата го сакаат гласот на своите родители. Читањето е одлично за развојот на мозокот, а воедно е и уште една можност за прегратка и близина.
6. Признаваат кога ќе згрешат
Кога ќе направите грешка, извинете му се на детето. Така го учите дека сите грешиме. Едноставно е: признајте што сте направиле и кажете „извини“. Иако е тешко, тоа е една од најдобрите работи за односот родител–дете.
„Децата сакаат кога родителите им се извинуваат – не затоа што мислат дека победиле, туку затоа што тоа е редок чин на искрена почит и човечност во семејството“, објаснува психологот Џенет Сасон Еџет.
7. Покажуваат наклонетост кон партнерот пред децата
Прегратки, бакнежи и допири – вашиот однос е главниот пример за љубов и партнерство што детето го гледа. Ваша задача е да поставите добар стандард.
8. Ги пофалуваат добрите постапки
Кога детето ќе среди зад себе или ќе сподели со брат или сестра без потсетување, покажете му дека сте горди. Тоа го зајакнува позитивното однесување.
„Позитивното поткрепување ни овозможува да ги препознаеме силните страни на децата и да изградиме подобра комуникација и поврзаност со нив“, објаснува психологот Беата Саудерс.
9. Им веруваат на своите инстинкти
Вие го познавате вашето дете подобро од кој било друг. Ако чувствувате дека нешто не е во ред, во ред е да го проверите тоа. Промените во однесувањето често се сигнал дека му е потребна поддршка.
10. Си даваат малку одмор
Нарачување пица по напорен ден не значи дека сте лош родител. Напротив, му покажувате на детето дека не мора секогаш сè да биде совршено.
Како што истакнува семејната терапевтка Лијан Авила, ниту еден родител не е совршен. Добрите родители грешат – но учат од грешките и се трудат да ги поправат.
