Одлуката да се прекине со раѓање може да биде една од најтешките семејни одлуки за родителите. Уживате во родителството, биолошкиот часовник полека отчукува, а вие се прашувате – ако не ја искористиме приликата, можеби ќе ни биде жал што немаме уште едно дете.
Но, да се роди уште едно дете само затоа што биолошкиот часовник отчукува не е знак дека сте подготвени да го проширите семејството. За да донесете толку важна одлука со сигурност, поставете си ги себеси следните прашања.
- Како е моето здравје? Кога се разгледува здравствената состојба, треба да се земат предвид компликациите за време на претходните бремености или раѓања. Ако знаете дека раѓањето на уште едно дете може да претставува оптоварување за вашето тело, размислете добро за нова бременост.
- Што е со логистиката? Ако уште бебе ви ја комплицира вашата логистика, односно се појават нови барања, како што е поголем автомобил, поголем простор за живеење, а вие не сте финансиски способни да ги исполните наведените потреби, може да се чувствувате фрустрирани и вознемирени со уште едно дете во семејството.
- Можете ли да поднесете уште еден период на неспиење? Ако не можете да замислите непроспиени ноќи, не сте подготвени за бебе.
- Можете ли да поднесете поголеми трошоци за живот? Ако математиката јасно покажува дека уште дено бебе ќе ги оптоварува вашите финансии, особено затоа што трошоците за живот се во пораст, прифатете го тоа како “црвено знаме“ за уште една бременост.
- Дали вашето семејство често патува? Ако патувањата се важни за вашето семејство, бидете свесни дека ќе мора да ги одложите или намалите за некое време.
- Дали ви е важна слободата? Постарите деца веќе не бараат толку многу, а вие се навикнавте да имате време за себе. Дали можете повторно да се посветите на едно лице 24 часа на ден, седум дена во неделата.
- Сакате да напредувате во кариерата? Доколку сте почнале да напредувате на работа и би ви било тешко да се вратите неколку чекори наназад, размислете добро за доаѓање на ново бебе.
- Можете ли подеднакво да се посветите на постарите деца и на идното бебе? Ако веќе сте оптоварени со справување со постаро дете или деца, тешко дека ќе имате помалку обврски со еден член повеќе.
- Што мислат останатите членови на семејството? Ако вашиот партнер не е за ново бебе, а и децата не се воодушевени, можеби не треба да инсистирате на нова бременост. Затоа што кога ќе дојде бебето ќе бидат вклучени сите членови на семејството.
- Дали сте задоволни од сегашната ситуација? Ако се чувствувате задоволни и благодарни за она што моментално го имате, а вашето семејство се чувствува комплетно – можеби треба да останете со сегашниот состав на семејството.
