Сигурно ги гушкате вашите деца секојдневно и нема потреба било кој да ви кажува дека треба да го правите тоа – едноставно, сакате и имате потреба да ги прегрнете децата, што е сосема природно.
Сепак, бидејќи има толку многу кои ги советуваат мајките да не го „навикнуваат бебето на раце“, а но и подоцна „не го гушкај толку, ќе го разгалиш“, ви пренесуваме неколку научни факти зошто е важно редовно да ги гушкате децата, според неврологот Олга Келн.
- Нежниот допир го стимулира растот на бебето
Допирот игра важна улога во физичкиот развој на новороденчињата, а влијае и на тоа да бебињата добиваат повеќе на тежина. Едно истражување спроведено во 1957 година покажало дека десет дополнителни минути физички контакт дневно значително го намалуваат бљуцкањето кај бебињата.
Во 1986 година, друга група научници истражувала како стимулацијата на допир влијае на предвремено родените бебиња, а резултатите покажале дека благодарение на физичкиот допир, овие бебиња напредувале побрзо во однос на тежината и развојот.
Научниците веруваат дека за ваквите резултати веројатно е одговорен окситоцинот, хормон поврзан со доверба, сигурност и љубов, кој се ослободува при физички контакт. Кога нивото на овој хормон се зголемува, се зголемуваат и другите хормони кои влијаат на растот.
Земајќи го сето ова предвид, допир или прегратка го стимулира ослободувањето на окситоцин во мозокот, стимулирајќи го растот на малечкото.
- Допирот влијае на менталниот и физичкиот развој на децата
Покрај тоа што влијае на растот и зголемувањето на телесната тежина, допирот има значително влијание и врз менталниот и физичкиот развој на децата.
Истата студија која утврдила дека предвремено родените бебиња напредуваат побрзо со допир, исто така покажала дека тие се подолго будни и поактивни, имаат подобри моторни вештини, ориентација и општо однесување. Овие ефекти биле долготрајни – кога повторно биле тестирани на возраст од осум и 12 месеци, тие сепак биле подобри од контролната група.
Неврологот наведува дека од самото раѓање детето дознава за светот и животот првенствено преку допир, физичкиот контакт со родителите за него има многу важна улога и го стимулира мозокот на малиот, влијаејќи на развојот.
- Им помага на децата да бидат здрави
Окситоцинот, хормонот кој се произведува при физички контакт, добро влијае на здравјето и на тој начин им помага на бебињата полесно да се борат против инфекциите. Како што покажало едно истражување од 2011 година, овој хормон помага дури и при повреди, така што тие побрзо заздравуваат.
Дополнително, друга студија која го испитувала ефектот на прегратките и поддршката врз подложноста на луѓето на инфекции и болести на горниот респираторен тракт покажа дека прегратките го намалуваат ризикот од инфекција и го прават поблаг кога ќе се појават.
- Прегратките им помагаат на децата подобро да се носат со стресот
Децата плачат за да укажат на нивните незадоволени потреби, а доколку не се одговори навреме, децата доживуваат стрес, вели неврологот. Како последица на стресот се зголемува нивото на хормонот кортизол, а бидејќи малите деца не знаат како да ги регулираат своите емоции, доколку родителите ја игнорираат ситуацијата, нивото на овој хормон може да стане толку високо што лошо влијае на физичко и ментално здравје на најмалите.
Меѓутоа, прегратките го активираат ослободувањето на окситоцин, кој го намалува нивото на хормоните на стресот, заштитувајќи ги најмалите од негативните последици на стресот. Исто така, тесните прегратки можат да му помогнат на детето да развие вештини за саморегулација и да изгради емоционална стабилност.
- Физичкиот контакт помага да се изгради доверба
Основата за градење силна, блиска врска е довербата, а на нивото на доверба влијае хормонот окситоцин кој се ослободува со физички контакт – ова е заклучокот на студијата од 2008 година. Една година подоцна, друга студија покажа дека окситоцинот ја зголемува субјективната перцепција за безбедноста во врската, го намалува стравот и ја зголемува довербата во другата личност.
