Аутизмот е нарушување што се појавува во детството и се карактеризира со невообичаени социјални интеракции, слаби комуникациски вештини, повторувачки однесувања, ограничени интереси и активности.
Ова нарушување е неизлечиво, но постојат различни терапии кои можат да им го олеснат животот на децата и возрасните со аутизам. Свеста за аутизмот е подигната во последниве години, што секако е добро, но и покрај ова, постојат некои состојби кои често се мешаат со ова нарушување поради сличните симптоми.
Во продолжение дознајте кои се тие состојби кои често се мешаат со аутизмот, но и како да ги разликувате.
1. Опсесивно-компулсивно нарушување
Во некои случаи, симптомите на опсесивно-компулсивно нарушување, како што се постојано миење раце, чистење или допирање на предмети како што се кваките на вратите, може да личат на повторувачките движења типични за аутизмот.
Клучната разлика е во тоа што луѓето со опсесивно-компулсивно растројство се чувствуваат непријатно, овие компулсии им пречат, додека повторувачките мисли и постапки често не им пречат на аутистичните лица. Напротив, овие постапки понекогаш можат да им донесат олеснување, пишува centerfordiscovery.com.
2. Асоцијално растројство на личноста
Честопати разговорно се нарекува социопатија, а ова растројство на личноста е придружено со обрасци кои ги кршат правата на другите. Луѓето со асоцијално растројство на личноста не се однесуваат во согласност со општествените норми, туку ги кршат правилата и законите без да се грижат за другите. Тие често немаат развиена емпатија и често наидуваат на проблеми со законот.
Луѓето со аутизам, исто така, понекогаш не ги почитуваат општествените норми, но разликата е во тоа што тие никогаш немаат скриен мотив или план, ниту пак искусиле злоупотреба, запоставување или траума во детството, што често е случај со асоцијалното растројство на личноста.
3. Шизофренија
Оваа сериозна ментална болест се карактеризира со нелогични мисли, бизарно однесување и говор, како и со заблуди или халуцинации, како што се слушање гласови.
И кај шизофренијата и кај аутизмот се јавуваат когнитивни и сензорни проблеми, а и двете се карактеризираат со атипичен развој на мозокот. Сепак, аутистичните лица немаат заблуди или халуцинации, кои се речиси клучните карактеристики на шизофренијата. Освен тоа, шизофренијата најчесто се дијагностицира во зрелоста, а аутизмот во детството.
4. Нарушувања во учењето
Нарушувањата во учењето се всушност спектар на нарушувања кои влијаат на вештините за пишување, читање и аритметика. Иако децата со аутизам исто така може да имаат потешкотии во учењето, тие обично имаат способност да се фокусираат и да разберат тема што ги интересира.
Аутизмот главно влијае на социјалните вештини, комуникацијата и повторувачките дејства и однесувања, вклучително и тесен опсег на интереси со кои аутистичното лице е речиси опседнато.
5. АДХД
Може да има одредено преклопување помеѓу симптомите на аутизам и нарушување на хиперактивноста со дефицит на внимание (АДХД), како што се тешкотии со фокусирање, хиперактивност и импулсивност.
Меѓутоа, додека децата со АДХД можат да одолеат на повторувањето и потребата за ред, овие работи можат да бидат многу утешни за оние со аутизам. Исто така, детето со аутизам може да се двоуми да зборува или да комуницира со други, освен ако не се работи за тема за која тоа е речиси опсесивно заинтересирано. Кога станува збор за АДХД, овие деца зборуваат импулсивно, честопати дури и ги прекинуваат другите.
Доколку забележите некој од овие симптоми кај вашето дете, не двоумете се да побарате мислење од специјалист. Имајте на ум дека каква и да е дијагнозата, подобро е навреме да се утврди, за што поскоро да му се помогне на детето и да му се олесни секојдневието.
