Емоционалната интелигенција е една од највредните особини што едно лице може да ги има. За разлика од когнитивната интелигенција, која се мери преку коефициент на интелигенција (IQ), емоционалната интелигенција може да се учи и развива. Стручњаците ја дефинираат како способност за препознавање, разбирање, изразување и управување со сопствените емоции. Токму таа е она што создава добар преговарач, сочувствителен пријател и љубезен колега.
Малите деца сè уште немаат целосно развиена емоционална интелигенција, но однесувањето на родителите кон нив може значително да помогне во градењето на основите за овие важни вештини во иднина.
Експертката за родителство Рим Рауда открива кои шест карактеристики ги имаат децата со високо развиена емоционална интелигенција. Таа проучувала однесување на повеќе од 200 деца и заклучила дека емоционално интелигентните деца покажуваат неколку клучни вештини.
- Препознаваат невербални сигнали
Како вистински „емоционални детективи“, тие добро ги разбираат чувствата на другите преку говорот на телото и изразите на лицето.
На пример, може да кажат: „Мамо, мојата другарка Сара денес беше многу тивка. Ја прашав дали сака да играме, а таа рече не. Мислам дека е тажна поради нешто.“
Како да ја развиете оваа вештина:
Разговарајте со децата за нивниот ден и за емоциите што ги забележале кај луѓето со кои биле во контакт. Овие разговори ја зајакнуваат нивната способност за препознавање емоции и ја градат самодовербата во разбирањето на другите.
Можете да прашате: „Какво мислиш дека беше расположението на твојата наставничка денес?“
- Покажуваат емпатија и сочувство
Тие не само што ги препознаваат туѓите емоции, туку и искрено се грижат и нудат поддршка.
На пример, за време на игра, детето забележува дека другар му е вознемирен бидејќи не победил. Му приоѓа и вели: „Навистина добро играше! Сакаш ли да играме нешто друго?“
Како да ја развиете оваа вештина:
Најмоќниот начин родителите да поттикнат емпатија е самите да ја покажуваат.
Ако на соседката не ѝ е добро, можете да кажете: „Загрижен/а сум за госпоѓа Брејди, ајде да видиме дали ѝ треба помош.“
- Умеат да ги именуваат своите емоции
Емоционално интелигентните деца лесно ги изразуваат своите чувства.
Кога детето вели: „Фрустриран/а сум затоа што не можам да ја решам оваа задача“ или „Среќен/на сум затоа што ѝ помогнав на другарка ми“, тоа јасно ги препознава и изразува своите емоции.
Како да ја развиете оваа вештина:
Именувајте ги сопствените емоции: „Малку сум преоптоварен/а со обврските денес.“
Кога децата умеат да ги именуваат чувствата, многу полесно доаѓаат до решение за проблемот.
- Лесно се приспособуваат
Детето кое мирно прифаќа промени во рутината или разочарувачки вести покажува емоционална зрелост.
На пример, ако роденденската забава на отворено се откаже поради дожд, наместо да се вознемири, детето вели:
„Во ред, врне дожд. Ајде да славиме внатре!“
Како да ја развиете оваа вештина:
Сè започнува од родителот. Кога сте флексибилни и смирени, децата го учат тоа од вас. Вклучете го детето во решавањето на проблемот: „Што можеме да направиме наместо тоа?“
- Добри се слушатели
Емоционално интелигентните деца забележуваат суптилни сигнали што другите можеби би ги пропуштиле.
Кога им раскажувате за вашиот ден, тие не само што слушаат, туку ги следат и емоциите зад зборовите. Поставуваат прашања и покажуваат искрена заинтересираност.
Како да ја развиете оваа вештина:
Кога детето зборува, посветете му целосно внимание. Одржувајте контакт со очи, прекинете со другите активности и спуштете се на неговото ниво. Повторете дел од кажаното за да му покажете дека навистина го слушате.
- Знаат да се саморегулираат
Емоционално интелигентните деца умеат да се справат со силни емоции, да останат смирени во тешки ситуации и да носат разумни одлуки.
Замислете дете кое губи во игра. Наместо да се налути, зема кратка пауза, длабоко вдишува и продолжува со позитивен став, и покрај разочарувањето.
Како да ја развиете оваа вештина:
Контролирањето на сопствените „мали изливи“ – викање или претерани реакции – е основа за развој на оваа вештина кај децата. Можете да ја воведете и техниката „застани и вдиши“, каде што детето учи да земе длабок здив или да брои до 10 во тешки моменти. Важно е и вие да му бидете пример.
