За тоа дека се повеќе деца се со прекумерна телесна тежина се зборува со години, а на тоа влијаат бројни фактори – од недостаток на физичка активност, прекумерно седење пред екрани, до изборот и достапноста на брза храна, пишува The Sun.
Нутриционистката и мајка Џена Хоуп открива некои изненадувачки работи кои придонесуваат за обезноста кај децата за кои родителите можеби и не се свесни.
- Соковите се скриена опасност
Многу родители веруваат дека овошните сокови се добри за децата бидејќи на тој начин добиваат витамини. Но, нутриционистката предупредува дека овие пијалаци содржат многу шеќер, па затоа е подобро најмалите едноставно да го јадат овошјето наместо да го пијат на овој начин.
„Децата не треба да пијат никакви напивки освен вода, тоа е едноставна замена. Разбирам дека соковите имаат убав, сладок вкус, така што постои голема веројатност детето само да ги побара, а родителите не се свесни за тоа. Факт е дека е многу подобро детето наместо да пие сок, да јаде јаболко или портокал“, вели Хоуп.
Таа додава дека ако детето навистина одбива да пие вода, можете да исцедите половина портокал во неа и да направите поздрава алтернатива на сокот.
- Поминување време пред екраните
Некои родители не знаат дека постои поврзаност помеѓу времето поминато на детето пред екран и прекумерната тежина и не се работи само за седење.
„Се повеќе деца јадат гледајќи ги екраните пред нив, што негативно влијае на регулацијата на апетитот. Кога ставате екран пред детето, неговиот мозок е фокусиран на екранот, а не на јадењето. А кога мозокот не е поврзан со храната, има поголеми шанси детето да јаде повеќе, што исто така може да влијае на апсорпцијата на хранливи материи, бидејќи нашиот стомак не произведува соодветни ензими за варење на храната“, објаснува нутриционистката.
Хоуп додава дека кога имаме на половина сварена храна во стомакот, тоа влијае на нивото на енергија.
„Тоа значи дека детето нема доволно енергија поради тоа и потоа бара повеќе шеќер, што доведува до маѓепсан круг“, вели таа и ги советува родителите да ги одвојат екраните од оброците.
- Грицките како дисциплина
Хоуп вели дека често гледа родители како им даваат грицки на своите деца за да ги купираат со нешто. Но, смета дека тоа е штетно за нив долгорочно.
„Кутија бисквити или чоколадо може да им заштеди малку време на родителите, но е и лошо за здравјето на децата. Малите деца мора да научат да се забавуваат сами, без грицки и екрани“.
- Храната како награда
Повеќето родители го прават тоа понекогаш – користат грицки и бонбони како награда за она што мама и тато бараат од нив да го направат. Но, тоа, вели нутриционистот, е почеток на долгорочни проблеми со храната кои можат да доведат до дебелеење.
Користењето на храната како награда придонесува за лошиот став кон храната подоцна во животот, каде што децата може да почнат да ја користат за да ги „контролираат“ своите емоции, предупредува Хоуп.
- Десерт после секој оброк
На децата, како и на возрасните, им треба одредена количина на калории во текот на денот, па да речеме, на просечно четиригодишно дете му требаат околу 1.300 калории дневно, а на десетгодишно дете околу 2.000 калории.
Затоа е важно децата да не јадат премногу слатки, а може да помогне и родителите да не се навикнат, на пример, да мораат да јадат десерт секој ден после ручекот.
„Дали десертот е навистина неопходен? Децата ќе пораснат мислејќи дека им треба нешто слатко после секој оброк, што секако не им е“, вели Хоуп.
- Потпирање на автомобили и детски колички
Џена истакнува дека прекумерната употреба на количка или автомобил за поминување на кратки растојанија може да влијае на зголемување на телесната тежина.
„Користењето на детски колички и патувањето со автомобил секако се фактори кои доведуваат до намалена физичка активност кај децата. На децата кои веќе можат самостојно да одат треба да им се даде можност повеќе да ги користат нозете, се разбира во разумна мера“, вели нутриционистот, додавајќи дека некои „брзо скокаат во автомобилот за да го поминат растојанието што всушност можат да го одат“.
Нутриционистката Хоуп вели дека е добро семејствата да поминуваат време надвор, да одат во паркови, семејни прошетки и да ги охрабруваат децата повеќе да пешачат или да возат велосипед.
