Родителството е жива и променлива категорија – се менува заедно со општеството, технологијата и новите сознанија за детскиот развој. Трендовите што денес се популарни, веќе утре може да се сметаат за застарени или дури и штетни.
Во продолжение издвојуваме неколку родителски практики за кои експертите предвидуваат дека ќе изгубат на важност во блиска иднина – можеби веќе до 2026 година.
1. “Интензивно родителство” и постојана стимулација
Долги години се веруваше дека „добар родител“ е оној што го запишува детето на сите можни активности – од англиски, преку музичко училиште, до спорт. Но, сè повеќе истражувања покажуваат дека на децата им треба и здодевност – токму тие моменти ја развиваат креативноста, внатрешната мотивација и отпорноста.
Прекумерната стимулација и премногу активности повеќе не се сметаат за корисни – туку заморни, и за детето и за родителите.
2. “Sharenting” – споделување детски фотографии на социјалните мрежи
Родителите сè почесто се прашуваат: Дали е во ред да објавуваме фотографии од нашите деца на интернет – без нивна дозвола?
До 2026 година се очекува овој тренд, познат како „sharenting“ (share + parenting), да стане општествено неприфатлив. Акцентот ќе се префрли кон заштита на приватноста и дигиталниот идентитет на децата.
3. Родител како постојан „хеликоптер“
Постојано контролирање на секој чекор, решавање на сите препреки наместо детето – оваа улога на „хеликоптер родител“ полека исчезнува.
Новите генерации родители учат како да пуштат, да дозволат детето да преземе ризик, да направи грешка – и да научи од неа. Ова е клучно за развој на самостојност и самодоверба.
4. Строги распореди за спиење и хранење според саат
Ригидните рутини се заменуваат со пофлексибилен пристап, кој ги зема предвид потребите на детето, но и реалноста на семејниот живот. Родителите денес се повеќе комбинираат наука и интуиција, наместо слепо следење на „правила“.
5. “Без екрани по секоја цена”
Целосната забрана на екрани станува сè потешка и нереална во денешниот дигитален свет. Наместо со забрани, експертите повикуваат на развој на дигитална писменост – учење децата како безбедно и умерено да користат технологија.
Да се исклучи технологијата не ве прави добар родител – подобро е да научите како да ја користите заедно со детето, со разбирање и надзор.
6. Родителот како “учител за сè”
Пандемијата ги натера многу родители да ја преземат улогата на учител дома – но, денес расте свеста дека родителот не мора да биде постојан „помошник“ за учење.
Трендот се движи кон тоа родителот да дава поддршка, но да не ги презема обврските, а учењето да остане во рацете на децата и наставниците.
7. Непроверени совети од социјалните мрежи
Социјалните мрежи се преполни со „брзи совети“ за спиење, исхрана и воспитување. Но, сè повеќе родители стануваат критични кон изворите на информации.
Се очекува дека до 2026 година, родителите ќе бараат веродостојни совети од стручњаци, а не од инфлуенсери без образование и искуство.
Што значи сето ова?
Бидејќи општеството и технологијата брзо се менуваат, така се менува и визијата за добро родителство. Она што порано било сметано за идеално, денес може да изгледа неодржливо, непотребно – или дури и штетно.
Наместо да се држиме до трендови, важно е да ги слушаме децата, да се информираме од доверливи извори и да бидеме свесни за промените што ги носи времето.
