Зимата конечно ни затропа на врата во сета своја убавина и острина. Иако понекогаш најмногу би сакале да останеме дома, под ќебе и со вклучено греење, тоа не е добро ниту за нас, ниту за бебињата. Важно е да се излегува на свеж воздух, без разлика на сè. Сепак, често се прашуваме колку е во ред да се биде надвор со најмалите на толку ниски температури. Еве што вели за тоа педијатарката д-р Џиована Армано.
Зимата и студеното време со ниски температури не се пречка здраво дете да се изнесе на прошетка. Не постојат строго пропишани температури на кои не смее да се излегува надвор. Во Скандинавија и северните земји, бебињата се шетаат и на температури од -5 до -10 степени, под услов да се соодветно облечени и престојот на отворено да им е пријатен и на родителите. Идеални зимски температури за престој надвор се околу 0 степени, а секако и повисоки.
Сè зависи и од временските услови. Ако има силно невреме, дува силен ветер или паѓа снежна виулица, секако дека бебето нема да го носите на прошетка. Не се препорачува шетање ниту при магла, ниту навечер.
Многу е важно како ќе го облечете бебето. За ниски температури, бебето треба да биде опремено со скафандер, топли чизмички, капа, ракавици, шал и дебели чорапчиња.
Новороденчиња и бебиња до една година
Новороденче до еден месец не би требало да се изнесува на прошетка во зима кога е студено. Бебе на возраст од еден месец до една година може да излегува надвор, добро облечено, дури и кога температурите се под нулата. Температурата може да биде и до -5 степени, ако е сончево, без ветер и доволно пријатно за родителите да прошетаат со бебето.
Должината на престојот надвор зависи од тоа колку им е пријатно и на бебето и на оној што го шета. На пример, од половина до еден час е сосема доволно, под услов бебето да е задоволно. Повремено можете да му ги допрете рачињата или носето за да проверите дали не му е премногу студено.
Постари деца
Поголемите деца, до околу тригодишна возраст, можат да бидат подолго време на студ, бидејќи обично се движат и учествуваат во активности – санкање, скијање, лизгање. Тие не се само во количка, туку се активни, па можат да поминат надвор и по два часа – наутро и по попладневната дремка, сè додека не се стемни.
Постарите деца, на возраст од околу пет до шест години, можат активно да учествуваат во зимски спортови, што подразбира и подолг престој на отворено, секако со соодветна облека и паузи за одмор.
