Тинејџерските години се фаза во растењето што воопшто не е лесна ниту за самите деца, ниту за нивните родители. Тинејџерите се обидуваат да ги манипулираат своите родители од различни причини, а психологот Џефри Бернштајн вели дека мајките и татковците честопати попуштаат под овие манипулации, чувствуваат вина и ги ставаат своите потреби настрана. Препознавањето на начините на кои овие делумно возрасни деца ги манипулираат своите родители може да им помогне на мајките и татковците да постават здрави граници и да бараат почитување.
Еве кои седум фрази тинејџерите најчесто ги користат за манипулирање со своите родители.
- „Јас не побарав да се родам“
Оваа фраза често предизвикува интензивни чувства на вина кај родителите, поради што мајките и татковците попуштаат на своите правила, граници и се обидуваат повеќе да му угодат на детето.
Како да реагирате: Останете цврсти, изразете емпатија, но не попуштајте пред неразумни барања. Потсетете ги дека секоја личност мора да преземе одговорност за своите избори и обврски.
- „Ми го должиш ова“
Манипулацијата преку вина е вообичаена, а децата ги користат грешките на своите родители за да ги оправдаат своите барања. Всушност, чувството на вина и грижа на совеста што и самите го имаат го вртат против своите родители.
Како да реагирате: Поставете јасни граници и потсетете им дека иако минатото е важно, сегашноста и иднината се нивна одговорност.
- „Да бев родител, ќе го направев ова за тебе“
Оваа изјава има за цел да ја намали довербата на родителите во нивните одлуки.
Како да реагирате: Останете смирени, признајте го вашиот придонес како родител и повторете ја потребата од меѓусебно почитување.
- „Ги обезвреднуваш моите емоции“
Зголемената свест за менталното здравје, за кое се зборува сè повеќе во последниве години – што е добро – исто така придонесе за фактот дека тинејџерите се во можност да го користат за манипулирање со своите родители. На овој начин, тинејџерите се обидуваат да се позиционираат како супериорни во однос на мама и тато, а потоа да ја „поништат“, обезвреднуваат грижата што ја имаат родителите, со цел да го добијат она што го сакаат.
Како да реагирате: Слушнете ги нивните грижи, но потсетете ги дека изразувањето емоции треба да биде меѓусебно и со почитување.
- „Мислев дека можам да сметам на тебе, но очигледно не“
Кога одбивате да направите нешто што тинејџерот го бара од вас, ова е еден начин тој да се обиде да ве манипулира. Целта на оваа фраза е да создаде тензија, да ви наметне нереални очекувања и да ве натера да чувствувате „сожалување“ за детето кое мисли дека „не може да се потпре на вас“ и на тој начин да му покажете дека може, односно да го исполни неговото барање.
Како да реагирате: Објаснете дека поддршката не значи напуштање на сопствените граници. Поставувањето реални очекувања е од суштинско значење.
- „Ако навистина ме сакаше, ќе го направеше ова за мене“
Овој пристап ја условува љубовта, што може да биде исклучително токсично.
Како да реагирате: Објаснете ја разликата помеѓу безусловната љубов и попуштањето на неразумните барања.
- „Мислиш само на себе“
Манипулацијата преку емоционална вина е честа тактика што ја користат тинејџерите за да ги натераат родителите да се сомневаат во своите одлуки и сепак да се препуштат на желбите на своите деца.
Како да реагирате: Повторете дека имате право на свои потреби и емоции и дека меѓусебното почитување е клучно за здрава врска.
