Во последно време, родителите стануваат сè повеќе свесни за она што се нарекува „сензорни проблеми“ кај децата. Сензорните проблеми се однесуваат на сензорната интеграција, а се манифестираат прекупотешко прилагодување на детето на околината и светот и нештата околу него воопшто. Она што за нас е „нормално“, кај детето може да предизвика нервен слом и испади на бес или плачење и со овој проблем и тоа како треба да се научи да се живее.
Дали вашето дете има сензорни проблеми, секако, може да процени и дијагноза да постави само специјалист. Но, ако ваш секој ден е борба со ситници, можеби и самите сте се посомневале во нешто слично.
Ова се седум индиции кои би можеле да укажат на сензорни проблеми:
- Постојано џвакање и гризење
Секако, малите деца сакаат да ставаат нешта во уста, но еден од знаците на сензорни проблеми е постојаното џвакање сè – од чаршафи до ракавот на маицата. Постојаното џвакање и гризење укажуваат на орални сензорни потреби кои не се задоволени.
Помогнете му на вашето дете со што е можно повеќе „џвакалки“: набавете ѓердани за џвакање, шишиња во кои може да се „стискаат“ и играчки кои ќе ги користи за да ги задоволи своите потреби.
- Постојано движење
Повторно – многумина ќе речат дека повеќето деца се такви, но прекумерната активност може да укаже на сензорни вестибуларни потреби на детето кои исто така не се соодветно задоволени.
Едноставно решение за потребите на овие деца се вестибуларни активности како што се нишање или терени со пречки.
- Посебна пребирливост во исхраната
На пребирливоста во јадењетп често се гледа како на негативно однесување бидејќи повеќето родители сметаат дека детето е непослушно, разгалено и пркосно. Сепак, храната често може да биде одбивни за децата со сензорни проблеми поради нејзиниот вкус, изглед и мирис, што е едноставно надвор од родителска контрола.
Обидете се храната да ја сервирате во мали количини и да ја направите визуелно привлечна.
- Неорганизираност
Дали имате дете кое никогаш не знае каде му се работите? Повторно, ова може да важи за повеќето деца, но дете со визуелни сензорни проблеми има потешкотии дури и со наједноставните задачи, како на пример да запомни каде му стои одредено парче облека или приборот за градинка или училиште, кои се секогаш на истото место.
Овој тип на дете ќе има корист од секое визуелно помагало, како што е голем картон со задачи и цртежи кои ќе ги водат.
- Одбивање на одредена облека
Многу деца се пребирливи за облеката и погрешниот пар панталони може да ги расплаче, но децата со сензорни тактилни проблеми се специфични. Може да бидат „иритирани“ од етикети, одредени чорапи или чевли или материјал на кој се навикнати, дури и без да го облечат тоа парче облека или обувки. Ваквите проблеми го отежнуваат извршувањето на секојдневните активности, подготвувањето за градинка или училиште и навреме да стигнете каде било.
Обидете се да ја намалите преосетливоста на вашето дете со помош на тактилни и сензорни игри.
- Избегнување на преполни и гласни места
Ова може да ве збуни затоа што многу деца со сензорни проблеми не се ни свесни дека не сакаат големи и бучни собири, на пример, паркови преполни со деца кои трчаат, скокаат, врескаат…
Но, работите може да ви станат појасни ако забележите дека секогаш кога ќе се најдете на такво место, нешто му пречи на вашето дете и изгледа како да му е непријатно без посебна причина.
Делумно можете да им помогнете со посета на одредени „критични места“ во периоди од денот кога нема толку многу гужви и врева, за децата да се навикнат на нив.
- Ненадејни промени во расположението, детето брзо и лесно се лути
Ако вашето дете е речиси постојано луто, како родител може да се чувствувате фрустрирано затоа што верувате дека е ваша вина што не сте постигнале подобри резултати. Но, тоа е „нормалната состојба“ на децата со сетилни проблеми, бидејќи тие едноставно секојдневно се „преоптоварени“ со разни дразби и ситуации од нивната околина, кои ги доживуваат почувствително и посилно од своите врсници.
