Грижата за сопственото здравје е од суштинско значење за секоја жена – важно е да разбереме што е нормално, а што не и навреме да се консултираме со лекар кога ќе забележиме проблем. Меѓутоа, според извештајот на британскиот парламент, жените се соочуваат со „медицинска мизогинија“ и „стигма“, поради што нивните симптоми често се игнорираат или минимизираат.
Проблеми со дијагностицирање на женски здравствени проблеми
Според Комитетот за еднаквост меѓу жените и мажите, недоволната едукација за здравствените состојби на жените, како што се ендометриозата, обилни менструации и аденомиозата, дополнително ја влошува состојбата. Претседателката на Комитетот, Сара Овен, истакнува дека секоја трета жена страда од обилни менструации, додека секоја десетта има состојба како ендометриоза или аденомиоза.
„Нашето истражување покажа дека мизогинијата во медицината ги остава жените во болки и со недијагностицирани состојби. Нивните симптоми се отфрлаат, лекувањето се одложува со години, а многумина поминуваат низ трауматски медицински процедури. За тоа време нивните состојби се влошуваат и стануваат потешки за лекување“, нагласува Овен.
Д-р Шазија Малик, консултант по акушерство и гинекологија во болницата Портланд, се согласува дека дијагностицирањето на гнеколошките проблеми често трае предолго, но додава дека тоа не може едноставно да се сведе на „медицинска мизогинија“.
„Жените навистина страдаат со години и често се дијагностицираат многу доцна. Но, мислам дека е преедноставено да се каже дека тоа е исклучиво поради мизогинија или незаинтересираност од страна на лекарите“, вели д-р Малик.
Посебен проблем лежи во фактот што младите девојки честопати не се доволно информирани за нивниот менструален циклус и што се смета за нормално, што дополнително ја отежнува навремената дијагноза.
Девет гинеколошки симптоми на кои треба да обрнете внимание
Д- р Малик издвојува девет симптоми кои често се нормализираат, но никогаш не смеат да бидат занемарени:
- Обилно долготрајно крварење
Ако обилното крварење влијае на вашиот секојдневен живот, како што е протекување низ облеката или постелнината и го оневозможува одењето на работа или училиште, треба да посетите лекар.
- Екстремна болка
Болката во текот на менструацијата не би смеела да предизвика изостанок од училиштето или работата. Доколку болката не се ублажи со стандардни аналгетици, потребно е подетално испитување.
- Болен полов однос
Болката за време на сексуалниот однос не е нормална и бара дополнителна дијагностика.
- Абнормален вагинален исцедок
Исцедок со невообичаен мирис или боја може да укажува на инфекција, полип или рак и треба да се испита.
- Болка при празнење на цревата за време на менструацијата
Ова е често занемарен симптом на ендометриоза.
- Крварење помеѓу менструации
Тоа може да биде знак за инфекција, полипи, фиброиди, рак или ектопична бременост.
- Крварење по менопаузата
Секое крварење повеќе од една година по менопаузата бара итна медицинска евалуација.
- Постојана надуеност
Надуеноста, особено со губење на тежината или чувство на грутка во стомакот, може да укаже на рак на јајчниците или фиброиди.
- Чешање и јазли
Чешање или јазли на подрачјето на вулвата или гениталната област може да укажуваат на инфекција или, поретко, на рак.
