Родителите често се стремат кон иста цел: да воспитаат љубезно, сочувствително и самостојно дете. Сепак, колку и да се трудиме, развојот на детето може да тргне по неочекуван пат. Децата се комплексни, непредвидливи и понекогаш растат во возрасни кои ги покажуваат истите особини што нивните родители се обиделе да ги избегнат.
Психолозите истакнуваат дека однесувањата како што се емоционалната незрелост, недостатокот на благодарност и верувањето дека сè им припаѓа може да бидат знаци за подлабок проблем – дури и кога родителскиот пристап бил грижлив и избалансиран. Значи, според експертите, ова се четирите особини на разгалени возрасни деца.
- Очекуваат награда за извршување на основни задачи
Еден од јасните знаци на разгаленост е верувањето дека секое извршено очекувано однесување заслужува награда – без разлика дали станува збор за доаѓање на работа на време или чистење на собата. Експертите предупредуваат: „Чистењето соба или организирањето на плакарот не треба да има цена – вистинската награда е чувството за ред и навики кои го олеснуваат секојдневниот живот“.
Наместо навиките да се стекнуваат преку разбирање на нивните придобивки, разгалените луѓе очекуваат пофалби или материјални награди за минимален напор, што им отежнува да воспостават самодисциплина во зрелоста.
- Ги понижуваат работниците во услужните дејности
Луѓето со силно чувство на супериорност често се однесуваат грубо кон келнерите, касиерите или доставувачите, иако можеби пораснале со родители кои секогаш покажувале почит кон овие професии.
Психологот Мелани Морисон објаснува дека луѓето на овие работни места почесто се изложени на непочитување бидејќи имаат помала моќ од клиентите: „Овие луѓе често немаат голема контрола, што ги прави полесни мети“. Иако нивните родители можеби дале пример за учтивост, возрасното дете кое се чувствува супериорно над другите ги користи послабите како издувен вентил.
- Тешко прифаќаат „не“ како одговор
Разгалените луѓе често веруваат дека правилата не важат за нив. Секаков вид на поставување на граници предизвикува фрустрација, муртење или емоционална манипулација.
Клиниката во Кливленд истакнува дека е природно луѓето да сакаат автономија, но важно е да знаат како да го прифатат одбивањето како дел од животот. Луѓето кои ја немаат развиено оваа способност често веруваат дека нивните потреби се над оние на другите и дека не треба да им се противречи, што доведува до проблеми во односите и на работа.
- Ретко изразуваат благодарност
Еден од највпечатливите знаци дека сте разгалени во зрелоста е недостатокот на благодарност – дури и во ситуации кога тоа е вообичаено и очекувано.
Арлин Цунчиќ вели: „Разгалените луѓе не се чувствуваат благодарни за она што го имаат. Тие веруваат дека сè им припаѓа, па затоа не ценат ништо“. Таквите поединци забораваат да кажат „благодарам“ дури и кога некој им прави значајна услуга затоа што не ја гледаат вредноста во она што им е дадено – тие сметаат дека сепак го заслужиле.
