Родителите имаат многу одговорности во воспитувањето на децата, а учењето за вредноста на парите е една од тие одговорности. Децата не знаат како да располагаат со пари и кога ќе ги добијат, многу од нив веднаш би ги потрошиле на своите омилени играчки. Родителите треба да ги научат како правилно, одговорно и смислено да ги потрошат парите што ги имаат, дури и на играчката што ја сакаат. Во продолжение ви пренесуваме неколку начини на кои родителите можат да ги подучат своите деца за финансиската одговорност и вредноста на парите.
Учете ги на сопствен пример
На многу начини, децата го имитираат однесувањето на своите родители, затоа родителите се тие кои треба да им покажат како одговорно да управуваат со парите со нивен пример. Родителите треба да им покажат на своите деца како да планираат, штедат и одговорно да ги трошат парите, нагласувајќи ја важноста на финансиското планирање.
Дајте им некои одговорности
Според едукаторот и тренер за родителство, Палава Рао Чатурведи, на децата треба „да им се доделат задачи и работни обврски соодветни на возраста за кои можат да заработат џепарлак. Ова ќе ги научи на вредноста на напорната работа, заработката на пари и ќе им даде чувство на задоволство од завршените задачи“.
Поттикнете ги да штедат со цел
Родителите треба да ги поттикнат децата да си постават краткорочни и долгорочни цели за штедење. Помогнете им да создадат план за штедење, кој може да биде заштеда за одредена играчка, книга, парче облека или нешто друго што тие го сакаат. Кога ќе успеат во тоа, пофалете ги нивните напори за да ги мотивирате да продолжат да штедат паметно и со цел.
Научете ги како паметно да ги трошат парите
Разговарајте со вашето дете за разликата помеѓу потребите и желбите. Охрабрете го да им дава приоритет на трошењето на основни работи и внимателно да размисли пред да направи импулсивно купувања. Научете го да ги споредува цените и да бара вредност кога купува.
