Предолгото гледање во мобилен телефон или компјутерски екран може да го зголеми ризикот од миопија (кратковидост) кај децата до 80 проценти, предупредува новата студија објавена во „The Lancet Digital Health“.
Повеќе од 3.000 испитувања за поврзаноста помеѓу изложеноста на паметни уреди и миопија кај децата и младите на возраст од три месеци до 33 години беа спроведени од страна на експерти од Универзитетот Anglia Ruskin во Кембриџ, Англија.
Загрижувачки податоци
Научниците откриле јасна врска помеѓу времето поминато во гледање телефон или таблет и поголем ризик за развој на миопија кај овие возрасни групи. Само паметните телефони го зголемуваат ризикот за 30 проценти, но во комбинација со прекумерна употреба на компјутер, ризикот се зголемува на 80 проценти.
Истражувачите стравуваат дека тоа може да значи дека до 2050 година, половина од светот може да биде кратковид или да страда од слични проблеми со губење на видот. Во 2019 година, Светската здравствена организација препорача децата под две години да не поминуваат воопшто време пред екранот, а децата на возраст од две до пет години да не поминуваат повеќе од еден час.
Но, истата година, студијата на CensusWide спроведена на 2.000 британски семејства покажала дека децата поминуваат просечно 23 часа неделно гледајќи во екраните. Бројни студии покажаа дека оваа бројка значително се зголемила за време на пандемијата Ковид-19, бидејќи луѓето останаа дома поради работа и школување.
Руперт Борн, професор по офталмологија и коавтор на студијата, рече дека миопијата е здравствена грижа која брзо ескалира.
- „Нашата студија е најсеопфатна досега за ова прашање и ја покажува потенцијалната врска помеѓу времето поминато пред екранот и миопијата кај младите луѓе“, рече тој
„Јасно е дека итно се потребни дополнителни истражувања за понатамошно разбирање на тоа како изложеноста на дигиталните уреди може да влијае на нашите очи и вид. Исто така, знаеме дека луѓето редовно не го доживуваат реалното време што го поминуваат пред екранот, затоа идните студии треба да користат објективни мерки за собирање на овие информации“, заклучува Борн.
