Постојат различни работи кои можат да ги влошат симптомите на астма или алергија. Тие се нарекуваат „тригери“. Вашиот лекар може да ви помогне да утврдите кои се тригерите на вашето дете. Поленот е чест тригер за многу деца.
Алергијата на полен спаѓа во една од најчестите видови алергии кои својот врв го доживуваат токму во пролет, кога сè се буди и цути и кога се јавува оној специфичен мирис на пролет во воздухот. Поленот е фин прав што некои растенија го создаваат при нивното размножување. Во текот на пролетта, летото и есента, поленот се ослободува во воздухот и ветрот го носи до други растенија за да ги оплоди. Внатре во овие зрна од полен се наоѓаат протеини што предизвикуваат алергиски реакции (како кивање, течење на носот и чешање на очите) кога ќе се вдишат. Поленот што најчесто предизвикува алергии доаѓа од тревите, дрвјата и плевелот.
Фактори кои ја зголемуваат веројатноста за алергија на полен
Генетска предиспозиција: Ако родителите имаат алергии, детето има поголема шанса да развие алергија на полен.
Средина и изложеност: Луѓето кои живеат во области со високи концентрации на полен или се често изложени на алергени, имаат поголема веројатност да развијат алергија.
Климата и сезоната: Поленот е најактивен во пролетните месеци, кога дрвјата и тревите цветаат. Некои области со поголема влажност или ветровити денови можат да го зголемат нивото на полен во воздухот.
Ако родителите имаат алергии, детето има поголема шанса да развие алергија на полен
Симптоми на пролетни алергии кај деца
- Кивање;
- Течење или затнат нос;
- Чешање на носот, очите, ушите и грлото;
- Солзење и црвенило на очите (алергиски конјунктивитис);
- Кашлица, особено ноќе или при изложеност на алергени;
- Отежнато дишење и симптоми слични на астма (во потешки случаи);
- Умор и раздразливост поради лош квалитет на сонот.
Третман и олеснување на симптомите
За ублажување на симптомите на пролетните алергии кај децата, може да се применат неколку методи. Физиолошкиот раствор за нос помага во испирање на алергените и одржување на носните канали чисти. Доколку симптомите се поизразени, лекарот може да препорача антихистаминици, кои го намалуваат кивањето, чешањето и насолзените очи. За деца со потешки симптоми, можно е користење на кортикостероидни спрејови за нос, кои помагаат во намалување на воспалението и затнувањето на носот. Ако детето има силно чешање и црвенило во очите, може да се користат капки за алергиски конјунктивитис. Во случај на тешки и упорни алергии, алерголозите може да препорачаат имунотерапија, со што постепено се намалува реакцијата на полен и се подобрува толеранцијата на организмот.
Како да му помогнете на вашето дете да се справи со поленот?
- Проверувајте го дневниот извештај за полен во временската прогноза. Кога нивото на полен е високо, детето треба да ја земе својата терапија за алергија пред да излезе надвор или да избегнува престој на отворено. Надворешните активности нека се одвиваат подоцна во денот, кога нивото на полен е пониско. По играње на отворено, детето треба да се истушира и да облече чиста облека.
- Држете ги прозорците и вратите затворени за време на сезоната на полен. Ако е жешко, користете клима-уред. Прочистувач на воздухот со HEPA филтер исто така може да помогне.
- Додека патувате со автомобил, држете ги прозорците затворени и користете клима-уред.
- Не дозволувајте вашето дете да коси трева или да собира лисја. Ако мора да работи на отворено, носењето заштитна маска со филтер може да го заштити од вдишување на полен.
- Практикувајте редовно туширање и миење коса, особено пред спиење, за да се избегне внесување на полен во постелнината.
- Облеката сушете ја во машина за сушење или во затворен простор, а не надвор.
