Ако имате профил на некоја социјална мрежа, сигурно нема да ви треба многу време за да најдете инфлуенсер кој заработува со објавување фотографии и видеа од неговото дете. Американската држава Илиноис влезе во историјата како прва во САД која донесе закон за заштита на децата на инфлуенсерите.
Законот беше едногласно усвоен во Сенатот уште во март, а официјално е потпишан на 11 август. Според него, инфлуенсерите помлади од 16 години ќе имаат право на процент од заработката на нивните родители, во зависност од тоа колку често тие се појавуваат во нивната содржина која генерира најмалку 10 центи по преглед.
Бидејќи законот е донесен само во Илиноис, видео содржината мора да биде креирана во таа држава, а децата ќе треба да бидат прикажани во најмалку 30 проценти од содржината во период од 30 дена. Парите ќе треба да се уплатат во фондација со која детето ќе може да управува кога ќе наполни 18 години.
„Интернетот им дава повеќе од било кога можности на децата да ја изразат својата креативност. Во случај малолетниците да можат да профитираат од оваа креативност, тие заслужуваат да бидат заштитени од родители кои би се обиделе да ги искористат талентите на детето за своја финансиска корист“, изјави портпаролот на гувернерот на Илиноис, Алекс Гоф.
Законот е резултат на иницијативата на тинејџерката Шреја Наламоту, која почнала да размислува за недостатокот на заштита на децата инфлусенсери. 16-годишната девојка спровела независна студија за ова прашање во училиште, а нејзиниот советник ја охрабрил да ја иницира идејата за воведување на законот. Таа тоа и го направила, а останатото е историја.
