Американската академија за педијатрија (ААП) издаде нови насоки за доење според кои мајките треба да ги дојат своите деца 2 години или подолго. Здружението на педијатри, исто така, нагласи дека се потребни „социјални и системски промени“ за да се поддржат мајките кои дојат да успеат во тоа.
Ажурираните препораки на ААП за мајките кои дојат, објавени во најновото, јулско издание на списанието „Pediatrics“, вклучуваат совети за ексклузивно доење во првите шест месеци од животот на бебето, додека доењето треба да продолжи во комбинација со нутритивно богата дохрана и по шест месеци. ААП вклучи препорака до здравствените работници да ги поддржуваат и охрабруваат мајките да дојат до 2 години или повеќе.
Важноста на мајчиното млеко
„Мајчиното млеко е уникатно по своите хранливи материи и заштитни ефекти и е навистина неверојатно кога ќе сфатите што прави за развојот на имунолошкиот систем на детето во развој“, рече експертката Џоан Јангер Мик, која е и главен автор на извештајот. „Не секоја жена може да дои или да продолжи да дои онолку колку што сака поради различни причини, вклучително и ограничувања наметнати од работните обврски. Семејствата заслужуваат поддршка без осуда, информации и помош што ќе ги водат во хранењето на нивното бебе“, рече таа.
Иако ААП нагласи дека на мајките што дојат им е потребна поддршка за да продолжат со тоа до вториот роденден на нивното дете, вклучувајќи бенефиции како што се универзално платено породилно отсуство, грижа за децата на работа и соба за доење во канцелариите, многу родители на социјалните мрежи веруваат дека се работи за лош момент. Имено, родителите во Америка постојано се борат со недостатокот на адаптирано млеко за доенчиња и одлуката на Врховниот суд да ја поништи пресудата на Рое против Вејд, со која дотогаш беше загарантирано правото на абортус во Америка.
„Дали го доев моето бебе до 2 години или подолго? Не. Дали би сакала да го дојам моето бебе до 2 години или подолго? Исто така не. Но дали мислам дека грижливите мајки треба да дојат 2 години или подолго, бидејќи тоа е најдобро за бебето? Исто така, не, воопшто. Овој совет од ААП нема смисла“, напиша една мајка на Твитер за новата препорака.
Друг корисник на Твитер ја нарече препораката иронична со оглед на недостатокот на платено родителско отсуство во САД. „Федералниот закон дава само 12 недели платено породилно отсуство. Американската академија за педијатрија препорачува најмалку 6 месеци доење. Повеќето работни места не се погодни за доење. Имаме недостиг од детска формула за бебиња низ целата земја. Како ќе ги прехраниме овие деца“, стои во објавата.
