Откако поминала два месеци во кома поради Ковид-19, Андреа Ариага Борхес (48) од Калифорнија ги повикува луѓето да се вакцинираат, пишува „Си-Ен-Ен“.
Андреа не била вакцинирана кога се разболела. Мајката на пет деца била позитивна на коронавирус во мај 2021 година, а неколку дена подоцна завршила во болница.
„Бев 65 дена во кома. Во болница поминав вкупно четири и пол месеци“, изјави Андреа. „Не можев да одам. Ги изгубив моторните вештини и мускулите, ослабев околу 35 килограми и се вратив дома во инвалидска количка. Морав повторно да научам да одам”, открила таа.
Пет проценти шанси за преживување
Андреа закрепнала, но последиците од инфекцијата со коронавирус останале, како нејзиниот „рапав глас“ што го добила по трахеотомија. Со месеци била на цевка за хранење, со месеци и не можела да зборува.
„Лекарите им рекле на моите деца, сестра и сопруг дека имам приближно пет проценти шанси да преживеам“, рече Андреа, која и покрај лошите прогнози сепак ја надминала тешката болест и си заминала дома на 29-ти август.
Таа претходно била против вакцинација. Но, откако се соочила со смртта, Андреа ги повикува луѓето да се вакцинираат.
„Не сакам никој да помине низ она низ кое поминав јас. Сè што можам да кажам е заштитите се и вакцинирајте се. Земете и дополнителна, бустер доза“, порачува таа. (Си-Ен-Ен)
