Ако на доенчињата им давате антибиотици, додека од нивната исхрана ги исфрлите јаткастите плодови и јајцата, ги изложувате на поголем ризик од развој на алергии во иднина во споредба со останатите новороденчиња, покажува ново истражување кое опфати околу 2,8 милиони деца од целиот свет.
„Употребата на антибиотици во текот на првиот месец од животот на детето може да резултира со поголем ризик од алергија на одредена храна“, тврди тимот американски научници и предупредува на нешто „помал степен“ на ризик доколку лековите се применуваат „во подоцнежната доенечка возраст“ или за време на бременоста.
Опсежната студија, објавена од Американското лекарско здружение (JAMA), „ги проширува нашите сознанија за начинот на кој се развиваат алергиите“, објавија научниците од канадскиот Универзитет „Мекмастер“ во Хамилтон.
Клучни фактори на ризик
Факт е дека постои поголема веројатност кај новороденчињата чии родители или браќа и сестри страдаат од алергии, исто така да се развие алергија, велат научниците. Тие тврдат и дека децата кои развиваат егзема се до четири пати поподложни на последователна појава на алергии во споредба со оние кои не страдаат од таа кожна болест.
Бројни стручњаци сметаат дека децата во порана возраст би требало да се изложуваат на намирници како што се јаткастите плодови и јајцата. Сметаат и дека веројатноста за развој на алергија е приближно двојно поголема кај оние деца на кои не им се дава кикиритки во кашеста форма до втората година од животот, во однос на бебињата на кои таа намирница им се дава во првата година.
Употребата на антибиотици во текот на првиот месец од животот на детето може да резултира со поголем ризик од алергија на одредена храна
„Трендот на алергии на одредени намирници не може целосно да се објасни исклучиво со генетиката. Во овој случај постојат разни интеракции, односно „совршена бура“ која вклучува генетски предиспозиции, здравјето на кожата, микробиомот и многу важната изложеност на околината“, изјави Дерек Чу од Мекмастер.“
Нивното откритие уследи по истражувањето на американскиот Универзитет „Јеил“, според кое „изложеноста на децата на разни микроби“ набрзо по раѓањето помага во блокирање на алергиските реакции подоцна во животот.
Хипотезата за хигиената и имунитетот
Тимот од „Јеил“ смета дека модерната опсесија со чистотата би можела да влијае врз тоа нашиот имунолошки систем да стане „недоволно истрениран“ и склон кон претерани реакции.
„Со индустријализацијата и употребата на антибиотици, дезинфекциски средства и вакцини, сè позаштитени сме од навистина опасните микроби, што е одлична вест“, смета Руслан Меџитов од „Јеил“, но предупредува: „Проблемот е во тоа што нашиот имунолошки систем, во таа недоволно „обучена“ и неподготвена состојба, поради вообичаено безопасна изложеност на различни фактори, може да реагира со патолошка алергиска реакција.“
Долгорочни предупредувања
Минатата година списанието Journal of Infectious Diseases објави предупредување според кое „повторената употреба на антибиотици пред втората година од животот“ на детето може да резултира со „зголемен ризик од развој на астма, алергии на храна и поленска треска во подоцнежниот период од животот“.
Уште кон крајот на 2024 година, тим шведски научници изнесе докази за „добро утврдената“ вистина дека растењето на фарма, во динамична селска средина, всушност значи „помал ризик од развој на алергии“, пренесува Хина.
