Уште во првата минута од својот живот, бебињата ја добиваат својата прва оценка, а во 5. минута, веќе и втората. Тие две оценки заедно, го сочинуваат апгар скорот, односно апгар тестот.
Тестот е осмислен од д-р Вирџинија Апгар, анестезиолог и педијатар за побрза и попрецизна ориентација за состојбата на детето, непосредно по раѓањето (но, не и подоцна во животот) и за потребите за дополнителна или итна медицинска нега. Обично се проценува во 1. и во 5. минута од животот, иако понекогаш може да се оценува и 10. минута, особено ако првите две оценки се ниски.
Апгар тестот е збир од оценки на пет параметри: бојата на кожата, работата на срцето, мускулниот тонус и одговор на стимулација. Секој од овие параметри се оценува со оценка од 0-2, па најдобра можна збирна оценка е 10, а најлоша 0. Оценките ги даваат гинекологот или педијатарот во родилиштето.
| БРОЈ НА БОДОВИ | 0 | 1 | 2 |
| Боја на кожата | бледа | Телото розеникаво, Екстремитетеите сини | розева |
| Работа на срцето | отсутна | ‹100/мин | ›100/мин |
| Дишење (ритам и напор) | отсутно | Бавно или неправилно, слаб плач | Нормално, силен плач |
| Мускулен тонус | Без движење, млитаво новороденче | Слабо свиткани екстремитети, оскудни движења | Активни, спонтани движења |
| Одговор на стимулација | Без одговор | Гримаса | Кивање, кашлање, оттурнување |
Оценките од 8-10 се сметаат за одличен резултат, додека новороденче кое ќе добие апгар оценка во првата минута помала од 7, а особено помала од 4 (0-3), потребни се некои мерки на реанимација, како што се ослободување на дишните патишта, примена на кислородна терапија, се до масажа на срцето и примена на лекови.
Често состојбата на новороденчето брзо се поправа, па тестот е одличен во 5. минута, што укажува на одлична способност на адаптација. Ако и после пет минути, апгар тестот останува понизок од 7, на бебето обично му е потребна дополнителна медицинска нега.
