Со оглед дека бебињата се чувствителни на промени на температурата, веројатно се прашувате дали во текот на летните жештини да ги изложувате на клима уред. Во принцип, клима уредот не може да му наштети на вашето бебе ако го користите на правилен начин.
- Добра подготовка
Пред да го вклучите клима уредот, проветрете ја просторијата во која престојува бебето. Потоа, затворете ги прозорците, но оставете ја вратата отворена, за да може воздухот да циркулира низ станот.
- Внимавајте на температурата
Додека детето е будно и активно, температурата во станот не треба да биде пониска од 23 степени. Општо правило е дека разликата помеѓу надворешната и внатрешната температура не треба да биде повеќе од 10, односно 8 степени во периодот на спиење на бебето.
- Редовно чистете ги филтрите
Редовното чистење на филтерот е многу важно за да се спречат бактериски инфекции. Доколку клима уредот се користи секојдневно, експертите препорачуваат филтрите да се чистат на секои две недели. Откако ќе ги извадите, доволно е да ги измиете во млака вода, добро да ги исушите и повторно да ги вратите.
- Нека дува „нагоре“
Внимавајте бебето да не е директно изложено на воздухот од климатизерот. Затоа, подигнете ги крилата, но истовремено внимавајте на правецот во кој климатизираниот воздух се одбива за да не биде повторно насочен кон детето.
- Бидете внимателни кога излегувате!
Доколку имате намера да излезете со бебето надвор, исклучете ја климата еден час пред излегување за да може телото на бебето постепено да се навикне на повисока температура.
