Бебе на 13 месеци ќе прооди или е веќе во фаза на проодување. Тоа станува незапирлива сила која брзо расте, а уште побрзо учи.
Што сега прави?
Со 13 месеци, детето нема само да истражува, туку и ќе експериментира. Истата работа ќе се обидува да ја направи на различни начини, а може да ги имитира и вашите подсвесни гестови, како тропкање со прст или одреден израз на лицето. Околу половина од бебињата на оваа возраст ќе го направат и првиот самостоен чекор. Првите чекори проследет ги со многу аплауз и охрабрување, но не очекувајте дека детето инстант ќе прооди. Ова е период кога бебето ќе го открива светот на две нозе и за него нова висина. Тоа пак значи дека понекогаш на челото може да има и модринка, и дека се од масата ќе се обиде да дофати и да го стави во уста.
Како комуницира?
Сега, кога е постаро, детето развива начин на кој комуницира со возрасните и е свесно на влијанието што го има врз нив. Сака да си игра и да ги закачка другите, а ужива и во реакциите што ги добива од луѓето. Тоа значи дека ќе ги повторува работите за кои ќе види дека кај околината предизвикуваат реакција.
Како може да му помогнете?
Вклучете го детето во се што правите и набљудувајте го како ве имитира. Дајте му упатства, од типот “заплескај со рачињата“ и направете го тоа. Наскоро ќе сфати што тоа значи. Освен плескањето, поттикнете го одењето и движењето. И паѓањето е составен дел од проодувањето, така да секое паѓање на газњето проследете го со насмевка за детето да не се обесхрабри или исплаши. На возраст од 13 месеци, особено им е интересно да одат по разни терени, како ливада, песок, камчиња, земја или бетон,а особено со радуваат на скокање во мали барички.
