Веќе сте доволно сигурни во однос на своето бебе, но ве интересира се за неговиот развој. Бебе на два месеца се подобро ги користи своите сетила за вид и за слух.
Што сега прави?
Бебе со наполнети два месеца може подобро да ја фокусира сликата и има подобар периферен вид. Сега веќе ве препознава со погледот (вашиот мирис го препознава од моментот на раѓање). И слухот е се подобар, па полека се врти во насока на изворот на звукот.
До крајот на вториот месец ќе удира со нозете и ќе мавта со рачињата кога ќе се возбуди – тоа се движења кои се подготовка за проодување, но и показател за добар развој.
Таа фасцинантна работа наречена насмевка, во овој период е она што ќе ве прави неизмерно среќни.
Како комуницира?
Бебето ќе почне да создава и други звуци освен плачење, како гугање и мрморење, и ќе се семее додека е будно.
Како може да му помогнете?
Овозможете му некое време да минува на под, за да може да ги истегне рачињата и нозете и да се движи како што сака. Тоа ќе го охрабри да се обидува што повеќе да се движи.
Ставајте го бебето во различни опкружувања кои ќе ги стимулираат сетилата. Пејте му, оти на бебето не му важно дали имате убав или лош глас. Важно е да го слуша вашиот глас, без разлика која музика ќе ја одберете.
Овозможете му прилика да истражува различни текстури, звуци, овозможете му различни погледи… така учи!
