Доењето е посебен период за мајката и бебето, особено откако ќе се воспостави ритамот и ќе се надминат оние почетни “проблеми“. Меѓутоа, што ако поради некоја причина бидете принудени да му го дадете на вашето бебе млекото во шише, а таа го одбива?
Најверојатно прво ќе помислите да го смените шишето или цуцлата на шишето, но воопшто проблемот не е во тоа. Вистината е дека млекото го сменило вкусот. Ако самите го пробате, ќе забележите дека млекото има чуден вкус, како да се расипано. Но со млекото се е во ред, само има поголема концентрација на липаза отколку кога бебето го пие директно од градите.
- Што е млеко со висока концентрација на липаза?
Липазата е ензим кој е присутен во мајчиното млеко, а неговата функција е да ги разградува мастите. Иако процесот што го извршуваат липазите е нормален, вишокот на овој ензим може да доведе до промена на вкусот на млекото, поради што бебето генерално го одбива. Вкусот може да биде помалку “метален“ или “сапунест“. Промената на вкусот не се случува веднаш, но може да се случи во рок од неколку часа по измолзувањето, особено ако го чувате на собна температура.
- Дали таквото млеко е опасно за бебето?
Иако вишокот на липаза може да го промени вкусот на млекото и да му даде расипан “шмек“, тоа не значи дека е навистина расипано и штетно за бебето. Ваквото млеко може да се консумира најнормално, без никакви последици, но факт е дека бебето најверојатно ќе одбие такво млеко поради неговиот интензивен вкус.
- Што предизвикува високо ниво на липаза?
Експертите сè уште не ги откриле причините зошто концентрацијата на липаза во мајчиното млеко се зголемува по измолзувањето. Може да се случи и кај првото дете да не се појави вишок липаза (или на детето да не му пречи), а кај второто да дојде до промена на млекото. Клучно е да се каже дека ако на детето не му пречи млекото и не се буни, слободно продолжете да го давате.
- Што можете да направите?
Доколку бебето го одбива млекото и забележите дека проблемот е во вкусот, а се сомневате во вишок на липаза, тоа можете да го решите со постапка по измолзувањето. Прво замрзнете неколку кесички млеко, а потоа извадете една од нив по една недела и проверете дали на бебето му се допаѓа вкусот.
Друга препорака е да го оставите млекото да зоврие веднаш по измолзувањето и потоа да го замрзнете. Всушност, загревањето го спречува дејството на липазата, па млекото нема да поприми чуден вкус.
