Во текот на целата бременост, бебето е многу активно и има многу интересен живот во матката. Но, нејзините движења почнувате да ги чувствувате дури во вториот триместар. Еве што утврдиле научниците за активностите на фетусот во мајчиниот стомак, од кои некои веќе сте знаеле, а некои ќе ве изненадат.
Бебето ика
Како што се развива, бебето стекнува различни вештини. Не е тајна дека бебињата икаат во стомакот, а мајката тоа го чувствува веќе во вториот триместар од бременоста. Некои трудници може да почувствуваат низа мали ритмички движења, а некои може да чувствуваат треперење во стомакот.
Препознава песни
На Универзитетот во Хелсинки направиле истражување на трудници во третиот триместар. Им пштале одредена песна во текот на неколку недели. Откако се родило бебето, забележале зголемена мозочна активност кај оние бебиња кои ја слушнале истата песна од стомакот на нивната мајка отколку кај оние кои никогаш не ја слушнале.
Вежба изрази на лицето
Гледајќи ги снимките од 3Д ултразвук, британските научници откриле дека до 24-та недела бебињата веќе можат да прават движења со усните, како да се насмеани, а до 36-тата недела ги движат другите делови од лицето; се муртат, можат да си го збрчкаат носот… Исто така често се проѕеваат и си го цицаат прстот.
Чувствува вкусови
За време на бременоста можеби имате силна потреба од одреден вид храна, но дали некогаш сте се запрашале како бебето го доживува тоа? Дали ќе сака солена и мрсна храна ако мајката во бремената јаде помфрит? Околу 20-тата недела, фетусот почнува да чувствува вкусови и мириси, како што е чадот од цигарите. Една студија потврдила дека бебињата на мајките кои јаделе, на пример, моркови за време на бременоста, претпочитаат моркови кога е време за дополнително хранење отколку оние чии мајки не јаделе од овој зеленчук.
Реагира на стрес
Ако сте биле изложени на стрес за време на бременоста, бидете сигурни дека и вашето бебе го почувствувало тоа. Снимките со ултразвук покажуваат дека додека мајките биле под стрес, бебето во утробата почесто го допирало неговото лице со левата рака.
Плаче
Едно истражување покажало дека звукот со ниска фреквенција насочен кон стомакот на мајката кај фетус во третиот триместар предизвикува однесување кое изгледа како да плаче. Бебето тогаш ја отвора устата, дише неправилно, а научниците го забележале и треперењето на усните.
