На сите родители им е позната следнава ситуација: сте го пресоблекле новороденчето, сте го нахраниле и сте го ставиле на спиење, но наместо да спие тоа плаче, па дури и вреска. Лицето му е искривено, очите широко отворени, а целото тело веќе поприма темноцрвена боја и навистина се чини како да испробува колку му се силни белите дробови.
Сте провериле дали е можно сè уште да е гладно, жедно, има ли грчеви или можеби пелената му е полна. И сето тоа сте го исклучиле. Па што не е во ред тогаш со него?
Можеби само се преправа дека плаче? Затоа што не ги гледате солзите да му течат по лицето и да паѓаат на перницата… Но, тешко дека вежба за својата прва актерска награда – ако не сте знаеле, новороденчињата плачат без солзи затоа што нивните солзни канали се уште се развиваат.
„Бебињата почнуваат да плачат со солзи по втората недела од животот, но кај некои овој процес трае подолго, па затоа е нормално кај некои деца солзните канали да се развиваат се до третиот месец од животот“, потврдува педијатарот д-р Тања Ремер Алтман за „Мамамиа“.
Кога ќе се формираат, жлездите во облик на бадем се сместени под горниот очен капак и произведуваат солзи кои го навлажнуваат окото.
„Штом ќе проработи солзниот канал, процесот наликува на дождовен облак; солзите се спуштаат низ окото до еден вид дренажен систем во внатрешниот агол на окото и продолжуваат да течат низ носот“, вели детскиот офталмолог д-р Филипа Шарвуд и објаснува дека, „колку се гледа дека плачеме т.е. дека солзите „ни се слеваат течат по образите“, зависи од овој „одводен“ систем и од тоа колку солзи произведува солзниот канал“.
Лекарите велат дека до ден-денес не е познато зошто бебињата се раѓаат со неразвиени солзни канали, а напоменуваат и дека се случува и малите деца да почнат да произведуваат солзи кои поради недоволно развиени или блокирани солзни канали не се слеваат нормално како што е опишано погоре, до рабовите на очите па надолу низ носот. Кога овие деца плачат, солзите им паѓаат право на образите, а проблемот може да биде во еден или во двата недоволно развиени солзни канали.
Може да спијат и со отворени очи
Иако можеби звучи чудно, всушност не треба да се плашите од тоа. Некои бебиња спијат со отворени очи, како резултат на медицинска состојба наречена лагофталмус.
Не е позната причината поради која бебињата можат да спијат со отворени очи, но тоа може да биде поврзано со нивните уникатни циклуси на спиење и поминување повеќе време во РЕМ фаза на сон отколку возрасните. Но, тоа е безопасно, прилично вообичаено и не укажува на проблем со спиењето.
