Седиштата за во автомобил им го спасуваат животот на децата и треба да се користат што е можно подолго.
Децата помали од 12 години, согласно законската регулатива не смеат да се превезуваат на предно седиште во автомобилот. За деца над 5 години задолжително е користење на сигурносен појас без разлика на тоа што детето седи на задното седиште од автомобилот и без разлика на тоа дали учествувате во сообраќај во населено или надвор од населено место.
Користење на детско седиште во автомобил за превоз на деца на возраст до 5 години е законска, морална, етичка, возачка и пред се родителска обврска. Иако постои тенденција на зголемена употреба на детски седишта во автомобилите, сепак, евидентен е фактот дека бројот на родители/возачи кои не користат детски седишта за превоз на деца до 5 години не е мал. Според истражувања на релевантни меѓународни организации, во случај на сообраќајна незгода, детските седишта ја намалуваат смртноста кај децата за 50 отсто, а кај бебињата и до 70 проценти.
Она што е особено важно е да бидете внимателни бидејќи дете никако не смеете да го возите во раце, односно да седи во вашата прегратка. Во оваа положба не смеете ниту да го врзувате со сигурносен појас. Во првиот случак невозможно е да се задржи детето од јачината на ударот при несреќа, додека појасот може дополнително да го повреди, бидејќи ќе се најде помеѓу детето и тежината на вашето тело.
