Извештајот се базира на податоци пред пандемијата на коронавирус, а УНИЦЕФ предупредува дека здравствената криза претставува дополнителна закана за благосостојбата на децата
Самоубиствата, незадоволството, дебелината и слабите социјални и академски вештини станаа премногу вообичаени одлики на детството во земјите со високи примања, според најновиот извештај на Канцеларијата за истражување на УНИЦЕФ – Innocenti.
Премногу деца во најбогатите земји во светот немаат основно познавање на математика и читање и страдаат од ментални нарушувања и дебелина.
Во извештајот е рангирана 41 членка на Европската унија и Организацијата за економска соработка и развој (OECD) според здравјето, вештините и среќата на децата. Данска, Холандија и Норвешка се во врвот, а Бугарија, Чиле и САД се на дното на списокот на земји со високи примања.
Во повеќето анализирани земји, околу 20 проценти од децата не се чувствуваат задоволни, покажува извештајот. Најлоша е Турција со само 53 проценти од децата, кои се задоволни од својот живот, а следуваат Јапонија и Велика Британија.
Литванија бележи најголем број самоубиства кај адолесцентите, додека Нов Зеланд и Естонија се на второто и третото место.
Ако владите не преземат итни и одлучни активности за заштита на благосостојбата на децата како дел од одговорот на пандемијата, можеме да очекуваме зголемување на сиромаштијата, полошо физичко и ментално здравје и понатамошно влошување на вештините на децата
Во однос на физичкото здравје, секое трето дете е дебело или има прекумерна тежина, а овие стапки нагло се зголемуваат во Јужна Европа. Околу 40 проценти од децата на возраст под 15 години во богатите земји немаат основни математички вештини и вештини за читање, повеќето се во Бугарија, Романија и Чиле.
Извештајот се базира на податоци пред пандемијата на коронавирус, а УНИЦЕФ предупредува дека здравствената криза претставува дополнителна закана за благосостојбата на децата.
„Многу од најбогатите земји во светот, кои имаат ресурси да обезбедат среќно детство за секого, ги изневерија децата“, изјави Гунила Олсон, директор на канцеларијата на УНИЦЕФ – Innocenti.
„Ако владите не преземат итни и одлучни активности за заштита на благосостојбата на децата како дел од одговорот на пандемијата, можеме да очекуваме зголемување на сиромаштијата, полошо физичко и ментално здравје и понатамошно влошување на вештините на децата“, додаде Олсон.
