Бебето сега во целост е покриено со нежни влакненца (лануго влакненца). Кожата на бебето се уште е тенка и нема видливо поткожно ткиво. Оваа недела почнува да се создава и таложи поткожно, кафено масно ткиво. Тоа е посебен вид на масно ткиво многу важно во подоцната липогенеза и термогенеза.
Бебето е долго 16-18 сантиметри, а тешко околу 180 грама.
Продолжува растот на матката чие дно (фундус) сега се наоѓа околу средината помеѓу пубичната симфиза и папокот. Продолжува и зголемувањето на дојките, а можна е и појава на стрии – црвенкасти или кафени линии на кожата кои се јавуваат по растегнување на кожата.
Можно е да дојде до појава и на болки во грбот. Причината за оваа појава е многу едноставна: за породувањето да биде воопшто можно, хормоните од бременоста го омекнуваат сврзното ткиво и рскавицата помеѓу карличните зглобови, и пршлените. Од таа причина доаѓа до закривеност на ‘рбетот и резултат се болки во грбот.
Болките во грбот се јавуваат пред се во текот на второто и третото тромесечје од бременоста. Затоа, лесната спортска активност може многу да помогне. Ако на работа седите, обезбедете си добра потпора за грбот. Кога спиете, нека биде тоа на страна. Не се препорачува загревање на грбот, бидејќи може да предизвика предвремени контракции.
Потребно е внимание кај болките во грбот проследени со појава на сукрвица или вагинално крварење, и тогаш задолжителен е гинеколошки преглед.
