Тешко е да се каже со сигурност колку е големо бебето сега, но просечно новороденче тежи околу 3400 грама, а долго е околу 50 сантиметри. Коските на бебешкиот череп се уште не се цврсти, што го олеснува неговото минување низ родилниот канал. Тоа е причина што некои бебиња, кога ќе се родат имаат конусна форма на главата. Но, не грижете се, тоа е привремена појава.
Бебешките рефлекси се подготвени – над 70, и бебето го чека денот кога ќе ја напушти матката. Папочната врвца ќе престане да функционира кога бебето прв пат ќе вдиши воздух, а постелката че се излупи од ѕидовите на матката.
Во 40. недела се породуваат речиси 70% од бремените жени. Доколу не сте меѓу нив, нема место за паника, до надносена бременост ве делат уште две недели – терминот се пресметува од првиот ден на последната менструација, а некои жени имаат овулација подоцна од очекуваната. Дури и со проверен датум, жените може да го надминат терминот, без никаква причина.
