Бебето е долго околу 51 сантиметар и продолжува да расте. Сега тежи околу 3600 грама. Поради безбедност на бебето, лекарот може да разговара со вас за индицирано породување – провокација, доколку бебето не се роди следната недела, но и порано ако постои некаков проблем.
Повеќето лекари, поради можни компликации, не чекаат да поминат повеќе од две недели од терминот.
Бебињата родени во 42. недела и подоцна може да имаат изразено сува кожа и често се претешки. Чекањето, исто така, го зголемува ризикот од развој на инфекции во матката, што може да биде опасно за бебето.
Тешко е да се остане смирен кога терминот одминува. Не се вознемирувајте. Ако грлото на матката не е доволно меко, не се отвора, се смета дека се уште не е подготвено за породување. Во тој случај, пред провокација, се користат хормони или “механички“ методи за отворање на грлото на матката. Во меѓувреме, веднаш информирајте го лекарот ако бебето ги намали движењата или ако забележите било каква течност од вагината.
