Секој кој во даден момент бил покрај бебе кое плаче знае колку е тешко да се смири. Лулање, пеење, шепотење, повивање, возење во количка или автомобил – родителите знаат дека некои од овие работи со текот на времето мора да „проработат“.
Но, научниците спроведоа интересна студија, објавена во „Current Biology“, во која открија техника која за само пет минути го смирува расплаканото бебе.
Како што напишаа научниците, ако сакате да го смирите расплаканото бебе, најлошото нешто што можете да направите е да го држите во раце и да седнете. Тоа би можело само да го продолжи плачењето.
Тие откриле дека е подобро да го земете бебето во раце и да тргнете во лесна прошетка. Таквата положба го намалува бројот на отчукувања на срцето кај бебето и му помага побрзо да заспие. Во текот на истражувањето, пет минути лесно одење биле доволни за да се смират бебињата кои плачеле и да заспијат.
Научниците препорачуваат бебињата да се држат цврсто во раце, да се потпираат главите и да се припијат до телото. Прошетката треба да биде на рамна површина и со рамномерно темпо без неочекувано застанување или вртење
Расплаканите бебиња се смириле и заспале во рок од пет минути кога биле држени во раце и шетани, дури и во текот на денот кога бебињата почесто се будни, објаснуваат истражувачите.
Интересно е тоа што истражувачите се позанимавале и со уште еден голем проблем со кој се соочуваат родителите кога ги заспиваат бебињата – како да го префрлат бебето од рацете во креветчето без да се разбуди.
Откриле дека лицата кои ги заспивале своите бебиња користејќи ја техниката „држи и шетај“ имале најголем успех во префрлањето на бебето во креветчето. Имено, ниту покривањето или затворањето на вратата од собата не успеало да ги разбуди бебињата.
Научниците препорачуваат бебињата да се држат цврсто во раце, да се потпираат главите и да се припијат до телото. Прошетката треба да биде на рамна површина и со рамномерно темпо без неочекувано застанување или вртење.
Иако истакнуваат дека секое бебе е различно, оваа техника покажала најголем успех меѓу расплаканите бебиња. Исто така, додаваат, студијата е спроведена на мал број бебиња, а за поконкретните причини зошто оваа техника најдобро функционира, ќе биде потребно да се спроведе подетална студија.
И други студии покажале дека бебињата на цицачите (вклучувајќи ги и луѓето) најбрзо се смируваат кога се носат. Овој феномен се нарекува „транспортен одговор“.
Научниците веруваат дека нишањето кое настанува со движењето на мајката (или таткото) го поттикнува бебето на спиење. Сличен ефект се постигнува со ставање на бебето во лулка и нежно нишање.
