Иако е разбирливо дека како родители не можеме постојано да му угодуваме на детето и да му дозволуваме се да биде по негово, во поставувањето граници исто така може да претераме, предупредуваат психолозите. Како што објаснуваат, многу родители знаат несвесно и ненамерно да претераат со својата строгост, а ова се знаците кои откриваат дека родителот можеби е малку престрог.
Еден од најчестите знаци што покажува дека некоја личност можеби има малку престрог пристап кон воспитувањето и родителството воопшто, е ако секогаш ги донесува сите одлуки наместо детето. Секако, некои важни одлуки ќе ги носите исклучиво вие, но понекогаш детето смее да избере облека за во градинка или училиште, како и да одлучи дали да го изеде или не целиот оброк за вечера.
Втора работа што често ја прават премногу строгите родители е да даваат наредби без детето да има можност да учествува во дијалог или разговор. Ако вие сте секогаш тие што ги поставуваат правилата, тоа може да биде знак дека сте малку престроги со вашето дете. Психолозите нагласуваат дека родителите кои не дозволуваат дијалог и разговор всушност му прават на детето повеќе штета отколку корист.
Исто така, престрогите родители често имаат превисоки очекувања од детето. Одлично е кога родителите ги инспирираат своите деца, веруваат во нивните способности и им помагаат да ги постигнат своите цели, но психолозите нагласуваат дека не е добро да се претера. Всушност, тоа може да биде многу лошо.
Имено, постојаниот притисок на родителите да биде најдобро во се, може само да создаде притисок врз детето и да доведе до спротивен ефект. Ако често е под таков стрес, детето на крајот може да се исплаши, да стане несигурно и да ја изгуби самодовербата.
Премногу строгите родители се исто така склони кон постојано критикување за кое е познато дека на многу начини му штети на менталниот развој на детето. Дополнително, дете кое има родители кои го критикуваат секој ден или наоѓаат маани во секоја негова одлука, со текот на времето, навистина ќе почне да верува дека не е доволно добро.
