Постои „висок“ ризик дека неодамна идентификуваните варијанти на коронавирус ќе предизвикаат дополнителен притисок врз здравствените системи и поголема смртност затоа што се позаразни, изјавија вчера од Европскиот центар за превенција и контрола на болести (ECDC).
- Во својот последен извештај, ECDC оценува дека „иако нема информации за потешки случаи на инфекција“ со овие варијанти на вирусот, нивната поголема инфективност ќе има „поизразен ефект врз бројот на хоспитализации и смртни случаи“
Ова посебно се однесува на „постарите лица или оние со коморбидитети“, наведува Центарот, чие седиште е во Стокхолм.
Извештајот првенствено е посветен на варијантите на вирусот, кои беа неодамна откриени во Велика Британија и Јужна Африка, а за кои е откриено дека имаат „зголемена трансмисија“.
Досега се потврдени повеќе од 3.000 случаи на инфекција со британската варијанта на вирусот во Велика Британија и ширум светот, пренесува „Хина“.
